Nuk është e vërtetë se Haki Haziri ka pranuar fajësinë për vrasjen e pesëfishtë në Smillkovcë të Shkupit. Avokati i Haki Hazirit, Naser Raufi, hodhi poshtë sot shkrimet në të përditshmen 'Fokus' duke thënë se deklarata e klientit të tij e dhënë para gjykatësit hetues është nxjerrë prej kontesti dhe me këtë tentohet të pengohet në procesin gjyqësor.
"E lexova në Fokus, mendoj që edhe një herë vërtetohet se është degraduar prezumcioni i pafajësisë, është nxjerrë nga kontesti deklarata e Hakiut .Është nxjerrë prej kontesti deklarata e vërtetë e Haki Hazirit, nuk ka të bëjë me deklaratë të vërtetë. Sipas deklaratës së dhënë nuk ka pasur të themi që përmenden armë, as armë ka pasur, as uniforma. Mendoj se janë nxjerrë nga kontesti. Unë mendoj se Haki Haziri nuk ka faj, jam i bindur në këtë", deklaroi Naser Raufi, avokat.
Në numrin e sotëm të së përditshmes në gjuhën maqedonase 'Fokus' thuhet se Haki Haziri para gjykatësit hetues në detaje ka përshkruar se si i ka vozitur vrasësit e pesëfishtë. Haziri, sipas të përditshmes 'Fokus', në hetim ka pohuar se nuk e ka ditur që përgatitet vrasje dhe nuk ka parë që vrasësit të kenë armë. Ai, gjithmonë sipas kësaj gazete, ka pritur në veturë, ndërsa ka filluar të dyshojë në qëllimin e tyre kur ka parë se maskohen dhe armatosen. Pas vrasjes, përshkruan ngjarjen 'Fokus' duke u mbështetur në burimet e veta, thuhet se vrasësit e kishin braktisur vendin, e kanë lënë veturën, më pas të njëjtën e ka gjetur policia. Ndërsa me veturë tjetër janë drejtuar kah fshatrat e Kumanovës ku xhaxhai i Hazirit u ka ndihmuar që në mënyrë ilegale të kalojnë kufirin në drejtim të Kosovës, thuhet ndër të tjerash në shkrimin e të përditshmes 'Fokus'. Haki Haziri u arrestua më 1 maj në aksionin policor 'Monstrum' por që nga 2 maji familjarët nuk dinin asgjë për djalin e tyre, deri më 8 maj kur në mënyrë misterioze u soll para gjykatësit hetues, i cili i caktoi masën e paraburgimit 30 ditor dhe i njëjti u dërgua në Prilep. Shkëlzen Aqifi
