Aksioni i fundit policor 'Monstrum' i ngjason skenarëve që i bënte Sllobodan Millosheviqi ndaj shqiptarëve të pafajshëm në Kosovë. Kështu i vlerësoi zhvillimet e fundit në Maqedoni, kryetari i partisë opozitare shqiptare PDSH-së Menduh Thaçi. Në një intervistë për RTV 21 në Kosovë, Thaçi reagoi mbrëmë ashpër ndaj mënyrës së keqtrajtimit të femrave shqiptare nga ana e policisë maqedonase si dhe heshtjes së Ahmetit për t'i mbrojtur ish luftëtarët e UÇK-së.
"Të gjithë ata që u maltretuan, më vjen shumë keq por më duhet ta them të vërtetën, bukfalisht të gjithë ishin pjesëmarrës në konfliktit 2001, po doni me një fjalor të drejtpërdrejtë njerëzit e Ali Ahmetit, po ky spati guximin gojën ta hapë, pamje të tilla që nuk mund ti shihni as në Mozambik. Gratë të tërhiqen zvarrë nga ana e policëve, nëna e cila del deklaron se polici i cili i arreston djalin, pasi e arreston i thotë do të bi të flejë pak këtu, bëma një kafe, kjo është provokim total për luftë, s'ka filozofi, mirëpo kjo vjen kur partia politike nënshtrohet tërësisht", deklaroi Menduh Thaçi, kryetar i PDSH-së.
Thaçi tha se efektin kryesor që deshën ta arrijnë maqedonasit nëpërmjet këtij aksioni është që ti etiketojnë shqiptarët në Maqedoni se janë islamikë radikal,gjë që nuk është e vërtetë.
"Kur këta marrin me aq lehtësi kualifikojnë se këto vrasjet e fundit ishin një akt i islamistëve radikal, unë me plot përgjegjësi them se islamistët radikal në Ballkan i kontrollon shërbimi sekret serb", tha Menduh Thaçi, kryetar i PDSH-së.
Thaçi tha se Qeveria nëpërmjet këtij aksioni tentoi që të mashtrojë NATO-n që në Çikago ta pranojë Maqedoninë si anëtare të saj
"MPB-ja dhe Qeveria filluan të bëjnë konstruksione politike. Të gjithë ata që nëpërkëmbeshin dhe arrestoheshin ishin shqiptar ndërsa kualifikimi publik ishte se këta janë radikal islamistë. Aq mendje e ulët, aq veprim suficit vetëvrasës politik që bën Qeveria e Maqedonisë unë nuk mund ta marr me mend. Këta besoni se janë bërë aq mendjemëdhenj, mendojnë se me kësi konstruksione të ndryshme të fëlliqura politike do ta frikojnë NATO-n që NATO-ja ti pranojë këta në organizmin e vet më 20 maj, kjo nuk do të ndodh", u shpreh Menduh Thaçi, kryetar i PDSH-së.
Lideri i opozitës shqiptare tha gjithashtu se sjellja e këtillë e Qeverisë së Maqedonisë ndaj shqiptarëve këtu është edhe për shkak të mungesës së politikës aktive nga ana e Shqipërisë dhe Kosovës në drejtim të shqiptarëve të Maqedonisë. Shkëlzen Aqifi
