Drejtori menaxhues për Evropën dhe Azinë Qendrore në Shërbimin Evropian të Punëve të Jashtme, Mirosllav Lajçak, u ka kërkuar autoriteteve në Serbi që sa më parë të formojnë qeverinë. Përveç mesazhit për vazhdimin e reformave, Lajçak mësohet t'u ketë dërguar zyrtarëve në Beograd edhe paketën në të cilën shpjegohet se çfarë pret Bashkimi Evropian nga kryeministri dhe presidenti i ardhshëm i Serbisë. "Kushtet për vazhdimin e dialogut me Brukselin, përfshijnë edhe disa veprime të rënda që duhet marrë, e të cilat kanë të bëjnë me Kosovën", raporton gazeta beogradase Novosti, duke u thirrur në burime brenda Presidencës serbe. Serbia është në pritje të formimit të qeverisë së re pas zgjedhjeve parlamentare të 6 majit. Shteti serb ka marrë statusin e kandidatit për anëtarësimin në Bashkimin Evropian, por jo edhe datën për fillimin e negociatave. Diplomatët evropianë i kanë kërkuar Serbisë që të normalizojë marrëdhëniet me Kosovën, për të avancuar në rrugën drejt BE-së. Ndërkohë duket se fundi i takimeve në kuadër të dialogut teknik mes Prishtinës dhe Beogradit do të shënojë edhe fundin e përfaqësimit të Kosovës në një dialog nga zëvendëskryeministrja Edita Tahiri. Burime të 'Kohës Ditore' kanë shpjeguar se kryeministri Thaçi po i mendon tre emra të stafit të tij, si përfaqësues të mundshëm të Kosovës në dialogun për veriun, që pritet të nisë në shtator. Këshilltari i kryeministrit Bekim Çollaku, ministrja e Integrimeve, Vlora Çitaku ose ministri i Jashtëm, Enver Hoxhaj, janë tre emrat e përfolur si udhëheqës të dialogut të ri me qytetarët serbë në veri të Kosovës, ku pritet që pas një kohe palë të jetë edhe Beogradi. Më parë është konsideruar edhe zëvendëskryeministri Hajredin Kuçi si një nga njerëzit që mund ta udhëheqë këtë dialog, ka bërë të ditur për këtë gazetë një zyrtar i lartë qeveritar. Alsat-M
