VMRO DPMNE siç njoftojnë burime partiake në parlament, është duke menduar seriozisht të tërheqë ligjin për Branitella dhe ta propozoj atë me procedurë të përshpejtuar duke anashkaluar kështu komisionet parlamentare dhe stërgjatjen e fjalimeve të deputetëve të BDI-së. Kjo siç mëson ALSAT M ka qenë edhe pjesë e bisedimeve të sotme të kreut të VMRO DPMNE-së Nikolla Gruevski me partnerët e tij të koalicionit që u zhvillua në hotelin Best Uestern në Shkup. Pas takimit deputeti i kësaj partie Ilija Dimovski zyrtarisht nuk e paralajmëroi një gjë të tillë por tha se qëndrimi i partisë së tij dhe partnerëve të koalicionit mbetet i njëjtë; 'Ligji për Branitellat është pozitiv dhe ka për t'u miratuar.
"Republika e Maqedonisë funksionon në bazë të Kushtetutës dhe në bazë të ligjeve. Kuvendi i RM-së funksionon në bazë të Rregullores dhe rregullave të tjera që ekzistojnë për punën e tij. Deputetët në kuadër të atyre mundësive veprojnë ashtu siç mendojnë, shohim se rregullorja ashtu siç është edhe sot mundëson një diapazon të gjerë të mundësive që të shfrytëzohen rregullat. Ajo që ne dëshirojmë të theksojmë sërish është se ligji për 'Branitellat', është ligj pozitiv i cili askujt nuk i merr kurrfarë të drejte dhe mundësie, përkundrazi e thellon këtë materie për të cilën tanimë ka një ligj të miratuar në RM. Prandaj vlerësojmë që partitë politike duhet ta tejkalojnë periudhën ku me emocione komentonin rreth ligjit për Branitella, dhe të bëjnë përpjekje që ta shohin në mënyrë racionale këtë propozim ligj", u shpreh Ilija Dimovski, VMRO-DPMNE.
Dimovski u shpreh se gjatë takimit me partnerët e koalicionit për një Maqedoni më të mirë, ndonëse nuk ka ra fjala për zgjedhjet e parakohshme VMRO-DPMNE është e gatshme për tu përballur me një sfidë të tillë.
"Nuk e shqyrtuam atë mundësi. Ishim të përqendruar në përgatitjen e konceptit rreth pjesëmarrjes në zgjedhjet lokale... Për VMRO DPMNE-në, zgjedhjet e parakohshme nuk janë opsioni më i dëshirueshëm, por theksojmë se VMRO-DPMNE është partia më e përgatitur në rast se do të ketë zgjedhje të parakohshme dhe të hyjë në fushatë zgjedhore", deklaroi Ilija Dimovski, VMRO-DPMNE.
Gjatë takimit në fjalë krahas çështjes politike është diskutuar edhe aspekti ekonomik. Në takimin e këtij koalicioni kanë marrë pjesë anëtarët e Komitetit ekzekutiv të VMRO-DPMNE-së, në mesin e të cilëve dhe drejtori i Drejtorisë për Siguri dhe Kundërzbulim, Sasho Mijallkov. Bedri Rexhallari
