Çmimin Nobel për Paqe për vitin 2012 e ka fituar Bashkimi Evropian, për rolin e tij afatgjatë në bashkimin e kontinentit. Komiteti Norvegjez i Paqes tha sot se BE-së i është ndarë ky çmim për kontributin që ka dhënë për gjashtë dekada në "avancimin e paqes dhe pajtimit, demokracisë dhe të drejtave të njeriut në Evropë". Përmes një deklarate, komiteti e ka uruar institucionin që përbëhet nga 27 vende anëtare për rolin e dhënë në shpërndarjen e stabilitetit në ish-vendet komuniste, pas rrëzimit të Murit të Berlinit në vitin 1989.
"Komiteti i Nobelit vendosi që Çmimi Nobel për paqe për vitin 2012 t'i ndahet Bashkimit Evropian. Bashkimi dhe paraardhësit e tij më shumë se gjashtë dekada kanë kontribuar për përhapjen e paqes dhe pajtimin si dhe na kanë treguar se si me dëshira dhe përpjekje të përbashkëta, armiqtë historik mund të jenë miq dhe partner të vërtetë", deklaroi Tornbjorn Jagland, kryetar i komitetit të Nobelit.
"Zonja dhe zotërinj, kur u zgjova në mëngjes nuk kam mundur të paramendoj se dita e sotme do të jete aq e gëzueshme për mua. Me emocione të mëdha e mësova lajmin se BE është fitues i Çmimit Nobel për paqe. Dua të theksoj se liria, demokracia dhe respektimi i së drejtës janë vlerat themelore ndaj të cilave duhet të synojnë njerëzit e të gjithë botës. Mburremi se BE është shpallur provaider më i madh i vlerave të këtilla", tha Hoze Manuel Baroso, kryetar i Komisionit Evropian. Alsat-M
