Më 2 nëntor në Galerinë e Arteve në Tetovë, në kuadër të manifestimeve të 100 vjetorit të shtetit shqiptar do të hapet një ekspozitë ndryshe nga ato që jemi mësuar të shohim deri më tani. Kësaj radhe, vizitorët nuk do të shohin piktura, por një lloj arti me gjilpërëza, me të cilin merret prej kohësh artisti Zeqir Mehmedi.
"Në vargun e aktiviteteve kulturore dhe artistike që bëhen për nder të 100 vjetorit të pavarësisë dhe të flamurit, kam dashur që edhe unë si artist i një lloji të veçantë të shprehjes artistike të kontribuojë për këtë festë të madhe të kombit. Më 2 nëntor në këtë vend ku jemi do të ekspozojë punimet e krijuara ndër vite që shprehin kulturën artistike shqiptare në 100 vitet e mëvetësisë së Shqipërisë. Tema kryesore e ekspozitës është alfabeti apo margaritarët e gjuhës ndaj të cilëve jam përkushtuar që ti paraqes ato në formën sa më artistike apo një punë që nuk është bërë deri më tani", tha Zeqir Mehmedi, autor i ekspozitës.
Në këtë ekspozitë përveç shkronjave dhe hartave të Shqipërisë, vizitorët do të kenë mundësi të shohin në këtë ekspozite, edhe emrat e atdhetarëve që kontribuuan për pavarësimin e shtetit shqiptar. Bëhet fjalë për emra të figurave emblematike të kombit, që nga Skënderbeu e deri tek figura shqiptare nga Maqedonia. Ekspozita hapet të premten në orën 18:00, dhe do të qëndrojë e hapur për 5 ditë me radhë. Ekspozita u mundësua falë financimit të Komuna e Tetovës dhe disa donator privatë. Bashkim Sulejmani
