Askush nuk duhet të frikësohet nga kremtimi i përbashkët dhe i koordinuar i shqiptarëve në këtë 100 vjetor pasi flamuri është simboli që historikisht ka bashkuar shqiptarët pavarësisht se në cilin shtet jetojnë. Kështu u shpreh zv/kryeministri, Musa Xhaferri pas takimeve që zhvilloi në Tiranë me presidentin , Bujar Nishani, kryeministrin Sali Berisha dhe kryebashkiakun e Tiranës, Lulzim Basha.
"Është legjitime që shqiptarët të jenë krenar në këtë 100 vjetor, kanë bërë përpjekje dhe shumë sakrifica historikisht, kanë përballuar shumë sisteme dhe shumë pushtues dhe është nder dhe nuk është kundër askujt dhe kërkojmë nga fqinjët që ta respektojmë këtë ditë që është e shenjtë për shqiptarët, 100 vjet rrugëtim", tha Musa Xhaferi, zv/kryeministër.
Ndërkohë, gjatë këtyre takimeve u diskutua edhe rreth koordinimit të aktiviteteve përmbyllëse me qëllim shënimin e 100 vjetorit të pavarësisë, gjegjësisht manifestimeve që organizohen me këtë rast në Maqedoni.
"Me këtë rast e ftuam drejtpërsëdrejti kryeministrin Berisha për manifestimin qendror më 25 nëntor në Shkup, kur do të kemi manifestimin final ku do të marrë pjesë kryeministri Berisha dhe kryeministri i Kosovës, Hashim Thaçi dhe të gjithë subjektet që janë të ftuar nga Maqedonia dhe me kënaqësi presim që ky aktivitet të jetë në nivelin e jubileut", u shpreh Musa Xhaferi, zv/kryeministër.
Gjatë takimeve të Xhaferrit me Nishanin, Berishën dhe Bashën u bisedua edhe për idenë e formimit të një Unioni të komunave shqiptare, ide kjo që doli pas takimit të kryebashkuakut të Tiranës Lulzim Basha me zv/kryeministrin Xhaferri vitin e kaluar në Shkup. Valmir Kuçi
