Sekretari i përgjithshëm i BDI-së nuk ka përgjigje konkrete mbi qëndrimet e reja të BDI-së në muajt në vijim pas dështimit të datës për negociata si dhe rënies në ujë të propozimit të Fyles për çeljen e bisedimeve paralelisht me zgjidhjen e çështjes së emrit. I pyetur nga ALSAT për përpjekjet që BDI-ja duhet të bëjë në bindjen e Qeverisë në zgjidhjen sa më të shpejtë të emrit, Ademi tha se çështja është e komplikuar. Në këtë mënyrë nuk ka as përgjigje ndaj partive opozitare shqiptare të cilat një ditë më parë i bënë thirrje BDI-së të tërhiqet nga Qeveria pas dështimeve të fundit.
A do ta bindë BDI-ja Gruevskin për këto 6 muaj që ta ndërrojë emrin e shtetit?
"Nuk është këtu çështje sa ne mund të bindim Gruevskin, çështja e emrit është çështje më komplekse e cila kërkon një konsenzus më të gjerë dhe jo vetëm mes subjekteve politike por kërkon konsenzus edhe mes qytetarëve. Disa herë e kemi thënë se kjo është çështje e ndjeshme e cila ndonjëherë prek edhe në çështjet e identitetit, kulturës, gjuhës e kështu me radhë dhe ne do të përkrahim proceset për të cilat mund të ketë avancim, edhe korniza e propozuar nga Fyle për zgjidhjen e çështjes së emrit është hap përpara, është një propozim kreative për të mos e bllokuar gjithë procesin", deklaroi Abdilaqim Ademi, sekretar i përgjithshëm i BDI-së.
Lidhur me polemikat brenda BDI-së që njëra anë e cilësoi si sukses Samitin e Këshillit të Ministrave dhe pala tjetër si humbje, Abdilaqim Ademi u rendit përkrahë Teuta Arfifit. Ai tha se është i pamohueshëm suksesi që është bërë për dialogun e nivelit të lartë.
"Deri më tani në këtë periudhë ne kemi arritur që të hapim edhe dialogun e lartë politikë i cili ka dhënë edhe rezultate konkrete, gjithashtu kemi edhe kornizën për tejkalimin e çështjes së emrit por edhe kjo që tani më është si konkluzion i këshillit të Evropës rreth dhënies së datës për datë që në afat prej 6 muajsh ne të arrijmë të kemi progres në disa nga sferat, konsiderojmë se është një hap përpara rreth integrimit të vendit në BE. Qëndrimi zyrtar i BDI-së është që Maqedonia ka bërë hapa të suksesshëm dhe hapa përpara drejt anëtarësimit dhe ne nuk do të ndalemi këtu por do të vazhdojmë edhe më tutje", tha Abdilaqim Ademi, sekretar i përgjithshëm i BDI-së.
Ditë më parë deputetja e BDI-së, Ermira Mehmeti pranoi se pritja nga Këshilli i Ministrave të BE-së ishte dëshpërim për Maqedoninë. Menjëherë pas kësaj partitë e tjera shqiptare kërkuan që BDI-ja të ripozicionohet në koalicionin qeveritar. Valmir Kuçi
