Teuta Arifi dhe Nevzat Bejta, sot deponuan dorëheqjet e tyre nga postet ministrore dhe u shprehen se do të angazhohen për zgjedhjet e ardhshme lokale të 24 marsit. Arifi pranoi se kjo është një sfidë e re për te, dhe u shpreh e bindur se sikurse para 11 viteve kur u bë femra e parë shqiptare deputete në parlamentin republikan, kësaj radhe do të jetë femra e parë që do të drejtoj komunën e Tetovës. Këtë ofertë të partisë së saj Arifi nuk e ndjen si degradim, përkundrazi si nder, për të luftuar siç u shpreh ajo, që Tetovën ta shndërroj në një qendër me të cilën do të krenohemi të gjithë ne.
"Sot jap dorëheqje nga funksioni i zv/ kryeministres për çështje evropiane dhe do ti përkushtohem plotësisht fushatës parazgjedhore që do të zhvillohet në Tetovë. Jam jashtëzakonisht e nderuar me faktin që partia ime vendosi që të më kandidoj për të udhëhequr me qytetin e Tetovës, qytetin më të madh të shqiptarëve në Maqedoni.. Dhe ashtu si përpara 11 vitesh kur kandidova për parlamentin e RM-së isha gruaja e parë shqiptare që arriti të bëhet anëtare e këtij parlamenti, jam më se e bindur që do të jem kryetarja e vetme femër, në këtë rast jo vetëm nga radhët e shqiptarëve. Kjo do të jetë për mua një sfidë, një obligim dhe një nder i veçantë për të dhënë kontribut maksimalë dhe për të bërë nga Tetova një qendër me të cilën do të nderohemi të gjithë dhe do të krenohemi të gjithë", tha Teuta Arifi, BDI
Në vij të njëjtë edhe bashkëpërtiaku i Arifit, Nevzat Bejta i cili dorëhiqet nga posti i ministrit të pushtetit lokal, për të zhvilluar betejën për qytetin Gostivarit, pa keqpërdorur kështu pozitën e të qenurit ministër.
"Duke mos dashur të keqpërdori pozitën ministër i vetëqeverisjes lokale në zgjedhjet lokale që do të mbahen më 24 mars, unë sot jap dorëheqje të pakthyeshme nga funksioni ministër i vetëqeverisjes lokale. Me këtë unë e respektoj vullnetin e shumicës së qytetarëve, respektoj vullnetin e partisë, respektoj demokracinë. Dhe prej sot unë jam qytetarë i lirë dhe i barabartë me gjithë qytetarët. Dhe prej sot unë kthehem tek qytetarët e Gostivarit të kuvendojmë dhe të punojmë për zgjedhjet lokale që do të mbahen më 24 mars", tha Nevzat Bejta, BDI.
Ndryshe i pari që theu akullin e dorëheqjes nga funksioni për të garuar në zgjedhjet lokale ishte tanimë ish deputeti i BDI-së Arben Llabenishta, i cili garon për qytetin e Strugës. Bedri Rexhallari
