Ekspertiza rreth vdekjes së gazetarit Nikolla Mlladenov ka përfunduar, dhe do të dorëzohet tek hetuesit. Kështu konfirmoi ministrja e brendshme Gordana Jankullovska e cila nuk deshi të jepte detaje të tjera rreth hetimeve më shumë se 1 javore, lidhur me vdekjes së Mlladenovit. Sipas saj, janë hetuesit ata që do të vlerësojnë nëse do ia shpalosin detajet publikut, apo jo, dhe në çfarë mase.
"Sa i përket esencës dhe përmbajtjes të asaj që është konfirmuar në ekspertizë, pyetjet dhe përgjigjet do të duhet t'i drejtoni tek gjykatësi hetues, i cili është i vetmi kompetent që udhëheq hetimet në këtë moment. Ne kemi bërë ekspertizat teknike të krimit dhe gjatë ditës së sotme raportet për të cilat kemi pasur urdhër t'i bëjmë, do të prezantohen para hetuesit", d deklaroi Gordana Jankullovska, ministre e punëve të brendshme.
Nga MPB-ja njoftojnë se ende pezull, ka mbetur ekspertiza e gjendjes teknike të automjetit, i cili mund t'i kalojë një institucioni të pavarur, sikurse Byroja për ekspertiza gjyqësore. Akoma nuk është gjetur as telefoni celular i Mlladenovit, edhe pse u tha se trupi i tij u gjet me anë të vendndodhjes së celularit. Të afërmit e Mlladenovit kanë kërkuar hetime të pavarura me mbikëqyrje ndërkombëtare në lidhje me vdekjen e tij, por tani për tani nuk ka ndonjë përgjigje nga institucionet. Themeluesi dhe pronari i gazetave ditore dhe javore "Fokus", vdiq pas një aksidenti të rëndë në lagjen Hipodrom të Shkupit, gjatë kthimit nga Velesi. Benjamin Arifi
