Zgjedhja e kryesuesit të këshillit të komunës së Tetovës u anulua sot gjatë seancës konstituive të këshillit të ri komunal. Pas verifikimit të mandatave të 31 këshilltarëve të kësaj përbërje me propozim të këshilltarëve të BDI-së u anuluar pika për zgjedhjen e kryesuesit të këshillit të komunës. Këshilltarët e BDI-së sqaruan se shkak i anulimit ka qenë mungesa e kandidatit. Pas pauzës dhe koordinimit, të gjithë këshilltarët njëzëri vendosën që kjo pikë e rendit të ditës të lihet për në seancën e radhës. Ndërkaq, kandidati më i përfolur për kryesues të këshillit është Hisen Xhemaili. Mandatet e këshilltarëve janë verifikuar nga ana e këshilltares më të vjetër. Në përbërjen e re të këshillit të komunës së Tetovës, BDI ka 12 këshilltarë, PDSH ka 10 këshilltarë, VMRO-DPMNE-ja ka 5, LSDM-ja 2 ndërsa nga 1 këshilltarë kanë RDK-ja dhe partia e Turqve.
"Përbërja juaj reflekton realitetin e qytetit tonë ku mbizotëron toleranca, vullneti dhe energjia pozitive për të kontribuuar që, të gjithë së bashku të gëzojmë një jetë më të mirë. Në sytë e mi ky këshill është parlament lokal që do i kryej punët nga kompetencat e veta në dobi të qytetarit dhe jo vetëm një makineri votimi. Në këtë institucion do të ngërthehen interesat e grupeve të ndryshme politike por ajo që të gjithë duhet ta keni gjithnjë parasysh është fakti se të gjithë ne së bashku përfaqësojmë interesat e qytetarëve", deklaroi Teuta Arifi, kryetare e Komunës së Tetovës.
Pas pjesëmarrjes në konstituimin e këshillit, Arifi priti në kabinetin e saj ambasadorin e Kroacisë Zllatko Kramariq me të cilin foli për përvojat në drejtimin e komunës. Kramariq, ka qenë për katër mandate, kryetar i komunës së Osjekut. Pas tij, në vizitë Arifi priti edhe ambasadoren e Gjermanisë Gudrun Shtajnaker, të cilën e informoi për planet e saj në modernizimin e administratës komunale dhe projekte të tjera. Bashkim Sulejmani
