Kryetari i ri i Komunës Qendër, Andrej Zhernovski përmes revizionit do të zbardh saktë se sa në të vërtet ka kushtuar projekti Shkupi 2014. Sipas Zhernovskit llogaridhënia e djeshme e ish kryetarit të Komunës Qendër, Vlladimir Todoroviq dhe Ministres së Kulturës, Elizabeta Kançevska-Milevska është e vonuar dhe se nuk fletë të vërtetën për mjetet që realisht janë harxhuar për gjithë projektin 'Shkupi 2014'.
'Ku ishte deri më tani llogaridhënia në programin e kryetarit të deritanishëm të Komunës Qendër Todoroviq dhe në programin e kryetarit të qytetit të Shkupit Koce Trajanovski? Ja, tani për njëherë japin llogari për projektin Shkupi 2014, në rregull është kjo punë, në rregull, pasi edhe unë dhe të gjithë ne si qytetar dëshirojmë të kuptojmë se sa kushtojnë ato objekte. Unë atë që kam premtuar do ta realizojë, e kjo është revizioni që do të zbardh se sa në fakt kushton i gjithë projekti Shkupi 2014", tha Andrej Zhernovski -- kryetar i Komunës Qendër.
Zhernovski i bëri apeloi pushtetin qendror që të ndalojë me vendosjen e përmendoreve të reja dhe uzurpimin e parqeve të gjelbëruara në Komunën Qendër. Zhernovski nesër do të mbajë seancën konstituive ku dhe zyrtarisht do të nisë të ushtrojë mandatin e njeriut të parë të Komunës Qendër. Ndryshe dje kryetari në largim i komunës Qendër, Vlladimir Todoroviq dhe Ministrja e kulturës Elizabeta Kançevska dolën me të dhëna se deri tani për projektin 'Shkupi 2014' janë harxhuar 207 milionë euro edhe pse fillimisht ishte paraparë që ai kushtoj rreth 80 milion. Todoroviq gjithashtu njoftoi se nga fundi i muajit të ardhshëm është paraparë vendosja edhe e përmendoreve shqiptare të Pjetër Bogdanit, Nexhat Agollit dhe Josif Bagerit. Valmir Kuçi
