Fushata në media dhe portale të ndryshme, nga eksponentë të partisë në pushtet dhe figurave qeveritare, tregojnë se kjo parti ka qasje anti amerikane, dhe fatkeqësisht, fushata e saj është në rritje dita-ditës. Kështu komentojnë për Alsat-in analistët Ismet Ramadani dhe Imer Ismaili. Sipas tyre, gjuha e tillë e qeveritarëve nënkupton edhe fundin e zgjidhjes së çështjes së emrit, që përbën pengesën kryesore për euro integrimin e vendit.
"Kjo qeveri në një mënyrë sado që kërkon të fshihet por është anti-amerikane, sepse vet mediat që kontrollon gjithnjë e më shumë po vjellin edhe teza edhe qëndrime anti-amerikane. Fundi i qershorit, në qoftë se nuk marrim datë për bisedime me BE-në, në qoftë se kjo qeveri nuk bën diçka më shumë për të arritur kompromis rreth çështjes së emrit me Greqinë për të zhbllokuar integrimet euroatlantike, atëherë partneri i qeverisë, BDI-ja duhet t'i thotë një 'Jo' të madhe, dhe të shkohet në një riorganizim tjetër me forcat më progresive, më pro perëndimore të partive maqedonase", tha Ismet Ramadani, analsit.
"Zoti Gruevski dhe partia e tij nuk mundet të shesë më demagogji, siç ka shitur këto vitet e fundit sepse zgjidhjes së çështjes së emrit të Maqedonisë i ka ardhur fundi dhe këtë fund dalëngadalë po e sjellë qeveria amerikane me aleatët e saj që ka në Evropë... dhe këtë zoti Gruevski e ka lexuar shumë mirë. Pikërisht ky nervozizëm në kampin politik maqedonas, konkretisht te VMRO-DPMNE, vjen nga ky fakt që problemit të emrit i ka ardhur fundi dhe këtë problem nuk do ta zgjidha qeveria e Maqedonisë por do t'ua zgjedhin të tjerët, për shkak se vetë qeveria tregon paaftësi ekstreme për ta zgjidhur këtë problem", deklaroi Ymer Ismaili, analist.
Analistët konsiderojnë se faktori politik shqiptar qoftë në pushtet apo opozitë, duhet të reagojë hapur dhe ashpër ndaj një politike të tillë, shteti i përbashkët nuk ndërtohet me dy orientime diametralisht të kundërta.
"Vet shëtitjet e kryeministrit nëpër vende të ndryshme të botës ku duket se dëshiron t'i tregojë BE-së edhe SHBA-së se unë jam duke punuar intensivisht për një alternativë tjetër, atëherë subjekti politik shqiptar, partia në pushtet, partitë opozitare, intelektualët, publicistët shqiptarë, duhet ta kundërshtojnë këtë politik, në mënyrë akoma më transparente, shumë më fuqishëm", u shpreh Ismet Ramadani, analist.
"Mbi 99% janë të orientuar pro NATO-s dhe BE-së. Nëse është kështu, atëherë partneri politik shqiptar në qeveri duhet të jetë përfaqësues i këtij vullneti të shqiptarëve e jo përfaqësues i elitave politike që përfaqësohen në kuluaret e qeverisë", tha Ymer Ismaili, analist.
Sipas analistëve, shqiptarët duhet të jenë më të zëshëm ndaj një fushate të tillë për shkak të miqësisë që kanë me SHBA-në, por edhe për shkak të investimeve që kanë bërë me vite në Maqedoni. Gjyltene Rexhallari
