Përmendoret shqiptare në kuadër të projektit 'Shkupi 2014' mund edhe të vendosen, nëse procedura ka qenë në rregull. Kështu ka njoftuar kryetari i ri i Komunës Qendër Andrej Zhernovski në një intervistë për Radio Evropa e Lirë. Ai thotë se për të nuk është me rëndësi nëse përmendoret janë maqedonase apo shqiptare, me rëndësi është nëse procedura për furnizimin e tyre ka qenë e pastër.
"Do të shohim deri ku është gjendja, nuk dua të spekuloj, nuk i shoh përmendoret nëse janë personazhe nga historia maqedonase, apo janë shqiptare, turke, rome e kështu me radhë. Mua më intereson procedura, mua më intereson për çfarë bëhet kjo, në çfarë mënyre është bërë, më intereson se a kushton ajo aq sa kanë njoftuar", ka deklaruar Andrej Zhernovski, kryetar i Komunës Qendër.
Sipas Zhernovskit mosvendosja e përmendoreve shqiptare gjatë mandatit të ish kryetarit të Qendrës Vlladimir Todoroviq dhe hedhja e barrës ndëretnike mbi supet e Zhernovskit është provokim nga ana e VMRO DPMNE-së.
"Nuk jam naiv, e di se jo rastësisht janë lënë pa u vendosur përmendoret e heronjve ose ato të cilat janë të rëndësishme për komunitetin shqiptar, por nuk do të bie në provokime të tilla, është shumë e qartë pse është bërë kjo. Aty ku ka kompetenca Komuna Qendër nuk do të lejoj vetë-vullnet të pushtetit qendror, dhe kjo nuk vlen vetëm për 'Shkupi 2014'", tha Andrej Zhernovski, kryetar i Komunës Qendër.
Zhernovski gjithashtu ka pohuar se që në fillimin e mandatit të tij, deri te ai kanë arritur 'propozime të pandershme' nga mafia urbane, që kanë të bëjnë kryesisht me ndërtime në Vodno.
"Aspak nuk më interesojnë ofertat që vijnë për mua prej atyre që ndërtojnë, që të hesht ose të mos shoh se çfarë ndodh e kështu me radhë. Oferta për të vazhduar me atë që është bërë në Planin detal urbanistik, oferta të llojit të mos ndërmarr masa konkrete për Planet urbanistike në Vodno e kështu me radhë. Kjo nuk do të ndodh", deklaroi Andrej Zhernovski, kryetar i Komunës Qendër.
Zhernovski që në ditën e parë të punës si kryetar i komunës Qendër kishte pezulluar të gjitha punimet për projektin "Shkupit 2014" duke paralajmëruar revizion të detajuar për të gjithë ndërtimet e deritanishme që janë nën kompetencë të komunës Qendër. Ndërsa duke folur për zhvillimet e fundit politike në bllokun opozitar, Zhernovski ka përjashtuar mundësinë për opsion të ri opozitar, të cilën sipas tij po e frymëzon VMRO DPMNE-ja. Benjamin Arifi
