Isa Ademi 58 vjeçar nga Shkupi sot në mëngjes është gjetur i varur në 'Parkun e Gazetarëve' në afërsi të godinës 'Nova Makedonija'. Ndonëse ngjarja ka ndodhur në orët e hershme të mëngjesit, trupi i pajetë ka qëndruar i varur në dru deri në ora 10:00, pas çka policia me ndihmën e zjarrfikësve kanë larguar trupin dhe e kanë nisur për në mjekësinë ligjore, për të kryer ekspertizën. Gjykatësja hetuese që doli në terren tha se është akoma herët të zbardhen rrethanat se si ka ndodhur vetëvarja, gjegjësisht se ka pasur ose jo në trup shenja të keqtrajtimit fizik.
"Do të bëhet autopsia që të vërtetohet shkaqet e vdekjes. Jo zyrtarisht akoma nuk e dimë se kur është varur, por diku rreth orës 9 të mëngjesit jemi lajmëruar për këtë rast", tha Fanka Jançullovska-Mitrevska, gjykatëse hetuese.
Kalimtarët e rastit dhe personat që ishin ndaluar të shohin se çfarë po ndodh, kritikuan autoritetet për faktin se trupin e pajetë të Isa Ademit e kishin lënë disa orë të qëndrojë i varur në pemë, edhe përkundër faktit se aty pranë kalojnë fëmijë, nxënës dhe shumë kalimtarë të tjerë të cilët tmerroheshin nga pamjet rrënqethëse.
Nga Ministria e Punëve të Brendshme thanë se janë duke punuar për zbardhjen e këtij rasti të pazakontë pasi varje të këtilla në qendër të qytetit nuk kanë ndodhur më parë. Valmir Kuçi
