Ofendim më i madh shqiptarëve, nuk iu është bërë asnjëherë. Por, mallkimet e Menduh Thaçit janë sinjal i falimentimit të kësaj partie. Kështu e komentojnë sot qytetarë dhe analistë, deklaratat e një dite më parë, dhënë të përditshmes 'Dnevnik. Shumica e qytetarëve nuk kanë preferuar të flasin para kamerave, duke dashur të mos merren aspak me figurën e tij, apo të komentojnë qëndrimet e tij.
"Ajo është turp për atë, që i ofendon shqiptarët. Ai duhet të merret me punë tjera dhe jo me shqiptarët e Tetovës. Kjo jo vetëm që shkon keq, por ai si Menduh, nuk e di edhe fundin ku e ka sepse veç është duke gabuar dhe jo duke ecur përpara".
"Ka gabuar...."
"A merret njëri me Menduhin?"
Edhe analistët janë shprehur të habitur nga përbetimi i Thaçit, se pas tradhtisë së tetovarëve që votuan për Ahmetin do të investojë duke ua nxirë jetën atyre.
"Ofendim më i madh shqiptarëve nuk ju është bërë asnjëherë, as elektoratit askujt, e pa kuptimtë", deklaroi Alajdin Demiri, analist politik.
Analisti Demiri thotë se me këto qëndrime, Thaçi ka firmosur falimentimin e kësaj partie në skenën politike. Sipas tij, deklaratat e tilla as që duhet të komentohen, por dalja nga kjo situatë patjetër kërkon ribërjen e partisë ose kryetar të ri.
"Deklaratë që nuk komentohet. Ajo deklaratë dje vetvetiu i tregoi të gjitha, tregoi gjendjen shpirtërore të një lideri, patologjitë në të cilat jeton, dhe si e percepton politik-bërjen. Në të vërtetë, unë mendoj se kjo është më fundi apo bankrot i partisë për arsye se në këtë mënyrë më partia nuk do të mundë të veprojë dhe ka dy rrugë, ose eliminimi i kryetarit ose ribërja e partisë apo shpërbërjen e partisë", tha Alajdin Demiri, analist politik.
Një ditë më pare, për një artikull të të përditshmes 'Dnevnik", kreu I PDSH-së përbetohej se 'tani, do të investonte që tetovarët ta kenë akoma më keq! Çdo mëngjes, uji që pinë t'u bëhet helm. Çdo ditë kur të shikohen në pasqyrë, të thonë se janë shpirtra të shitur, se janë tradhtarë. Bashkim Sulejmani
