Dy të dyshuarit për rastin 'Monstra', Afrim Ismailoviq dhe Alil Demiri, nuk kanë shtetësi kosovare dhe as që kanë aplikuar për marrjen e saj. Kështu e ka informuar ministri kosovar i brendshëm Bajram Rexhepi, homologen e tij të Maqedonisë Gordana Jankullovska, në Konferencën ballkanike në Slloveni. Shtetësia kosovare mund të ishte pengesë për ekstradimin e dy të dyshuarve për rastin 'Monstra' në Maqedoni, bazuar në marrëveshjen aktuale për ekstradim. Ministri Rexhepi ka siguruar Jankullovskën se institucionet kosovare do të respektojnë normat ndërkombëtare përsa i përket ekstradimit të të dyshuarve. Ndërkohë ministria e drejtësisë në Maqedoni akoma nuk ka ndonjë informacion konkrete se kur duhet të realizohet ekstradimi i Demirit dhe Ismailoviqit. Zv/ministrja Brishkovska Boshkovska theksoi se ende pritet një përgjigje nga ministria kosovare e drejtësisë.
"Në lidhje me ekstradimin, ministria e drejtësisë pret përgjigje nga autoritetet kosovare. Presim përgjigje pozitive sa i përket ekstradimit, dhe shpresojmë që një përgjigje e tillë të vijë sa më shpejtë. Nga ana e Ministrisë së Drejtësisë është dorëzuar kërkesë deri te autoritetet kosovare", tha Biljana Brishkovska Boshkovska, zv/ministre e drejtësisë.
Afrim Ismailoviq dhe Alil Demiri u arrestuan në Prishtinë më 3 mars të këtij viti. Ata akuzohen për vrasjen e pesëfishtë të 12 prillit të vitit të kaluar pranë Liqenit të Smillkovës. Gjykimi rreth rastit 'Monstra' kundër katër të dyshuarve të tjerë të cilët gjenden në paraburgim në Shkup, vazhdon. Sipas mbrojtjes, prokuroria nuk posedon dëshmi të qëndrueshme të cilat do të vërtetonin se gjashtë personat e akuzuar janë fajtorë për vrasjen në Smillkovë. Benjamin Arifi
