Akuzat e presidentit Ivanov se vendet anëtarë të Bashkimit Evropian janë fajtore për dështimin e Samitit të Ohrit janë të papërgjegjshme sidomos duke marrë parasysh se vijnë nga i pari i shtetit. Kështu mendojnë analistët, të cilët fajësojnë Ivanovin për dështimin e Samitit të Ohrit, dhe deklaratat e tij i cilësojnë si debakël të dytë pas dështimit të Samitit. Ismet Ramadani thotë se Gjorge Ivanov me deklarata të tilla nxjerr në sipërfaqe qëndrimet e tij që janë kundër përcaktimit të mbi 90% të qytetarëve, të cilët duan anëtarësim të Maqedonisë në Bashkimin Evropian dhe NATO.
"Krejtësisht do të ishin legjitime po të ishin këto deklarime nga një pozicion i një intelektuali, por asnjëherë nuk mund të arsyetohet nga një president shteti. Ajo që brengos është se definitivisht del në pah se blloku maqedonas është i ndarë në pro-evropian dhe pro-amerikan, dhe pro një alternative tjetër", tha Ismet Ramadani, analist.
Ramadani vlerëson se nëse vazhdon kjo politikë anti evropiane dhe anti amerikane e institucioneve shtetërore, partitë shqiptare duhet të distancohen nga politika e tillë dhe të respektojnë përcaktimin pro-evropian dhe pro-amerikan të qytetarëve shqiptar në Maqedoni. Nga ana tjetër, drejtoresha e Institutit për politikë evropiane Malinka Jordanova thekson se fajtor i vetëm për dështimin e Samitit të Ohrit është vetë Maqedonia. Sipas saj, nuk mbajnë akuzat e presidentit Ivanov se vendet e Bashkimit Evropian pengojnë faktorizimin e Maqedonisë në rajon.
"Debakël edhe më i madh është alibia e cila mundohet të sigurojë, se për këtë është fajtor dikush tjetër, gjegjësisht se nuk kanë ndihmuar vendet anëtarë të BE-së që ai të mbahet, dhe të marrin pjesë edhe Kosova dhe Serbia. Maqedonia është e pozicionuar mirë në raport me të dy shtetet, që të mund të sigurojë impuls më të madh në korniza rajonale, dhe nuk ka arsye që për vendet e BE-së të jetë problem. Përkundrazi, ato gjithmonë kanë stimuluar rol aktiv të Maqedonisë në këtë plan", u shpreh Malinka Jordanova, Instituti për politikë evropiane.
Analistët pajtohen se akuzat e tilla të Ivanovit janë vetëm në funksion të arsyetimit të dështimit diplomatik të Maqedonisë në organizimin e Samitit të liderëve në Ohër. Benjamin Arifi
