Sali Berisha do të mbetet përgjithmonë kryeministër për shqiptarët e Maqedonisë. Kështu ka deklaruar kryetari i BDI-së Ali Ahmeti pas takimit me kryeministrin shqiptar në largim, gjatë vizitës së tij njëditore në Tiranë.
Kryetari i BDI-së Ali Ahmeti ka falënderuar kryeministrin në ikje Sali Berisha për kujdesin dhe kontributin e dhënë për shqiptarët e Maqedonisë, gjatë 8 viteve qeverisje me shtetin shqiptar.
"Kam ardhë ta falënderoj për të gjithë përkrahjen që na e ka dhënë , që edhe zë vëndin e merituar në NATO dhe në strukturat evropiane. Kam ardhë të ju them publikisht që do të mbetet udhëheqës dhe kryeministër i përhershëm", tha Ali Ahmeti, kryetar i BDI-së.
Kryeministri në largim, Berisha ka vlerësuar BDI-në dhe kreun e saj Ahmeti si faktorë të rëndësishëm në proceset politike të shqiptarëve të Maqedonisë pas vitit 2001.
"Z. Ali Ahmeti si kryetar i kësaj partie ka merita shumë të mëdha në të gjitha zhvillimet positive, nga Marrëveshja e Ohrit dhe zbatimi i saj. Faktor që sollën Marrëveshjen e Ohrit, kontributi që jep në një situatë jo të lehtë për stabilitetin dhe progresin e Maqedonisë", u shpreh Sali Berisha, kryeministër i Shqipërisë.
Gjatë qëndrimit të tij zyrtar në Tiranë, Ahmeti u prit edhe nga kryeministri i ardhshëm Edi Rama dhe kryetari i LSI-së Ilir Meta. Kreu i BDI-së përgëzoi partnerët e koalicionit të majtë për rezultatin e arritur në zgjedhje dhe kërkoi përkrahje nga Qeveria e re shqiptare për proceset integruese të Maqedonisë. Ahmeti me Ramën dhe Metën kanë diskutuar gjithashtu edhe për bashkëpunim mes dy vendeve në sferën e arsimit dhe kulturës. Benjamin Arifi
