Për ligjin e ri të mediave duhet të shprehen vetëm mediat! Kështu thonë partitë politike. Ndërsa organizatat relevante si dhe grupet që merren me demokracinë në vend, nuk e kanë marrë mundimin e shqyrtimit të ligjit. Të gjithë, ose nuk janë në dijeni, ose nuk kanë nisur me shqyrtimin e ndryshimeve në këtij ligji. Si Shoqata e Gazetarëve të Maqedonisë, Instituti Maqedonas i Medias, Qendra për Zhvillimin e Mediave, por edhe të tjera grupe që ndjekin situatën e lirisë së medias në prizmin e demokracisë në vend, përfshi këtu edhe Komitetin e Helsinkit, thonë se ende nuk e kanë analizuar ligjin e ri, që në fakt është ndarë në dy të tillë. Deri tani, për ligjin e ri që qeveria kaloi dy net më parë, vetëm OSBE-ja ka shprehur përshtypjet e para. Sipas saj, megjithëse janë bërë disa përmirësime, sërish mbeten shqetësime të mëdha për ndryshime të mundshme. Sipas OSBE-së, ndarja në dy ligje nuk është dramatike, por më shumë shqetësuese është monitorimi shtetëror. Ligjit i janë hequr disa referenca të panevojshme, ndërsa nga ana tjetër, shpifja vazhdon të jetë në fokus të tij, duke lënë hapësirë për ndrydhje të lirisë së gazetarëve.
"Neni 9 (ose neni 10 i ligjit të vjetër) i referohet ligjit për përgjegjësisë civile për shpifje dhe fyerje në bazë etike. Edhe pse gjasat janë më të vogla për kërkuar kompensime nga shpifjet dhe fyerjet, ajo duhet të kufizohet akoma më shumë, veçanërisht në raste të tilla kur serioziteti i veprës penale tejkalon efektin e mundshëm, si për shembull padi që mund të cenojnë lirinë e shprehjes.
Në shqyrtimin e OSBE-së mbi amendimet e reja të qeverisë, theksohet se ka ende paqartësi në vetë-rregullimin, në revokimin e licencës, kufizimet e pronësisë, agjencinë për media si dhe veprimtaria e shërbimit publik.
"Ligji është ende i mjegullt për sa i përket dallimit mes vetë-rregullimit dhe rregullimit formal, duke e përmendur vetë-rregullimin në shumë raste dhe duke e bërë kështu obliguese dhe për rrjedhojë, duke kufizuar karakterin vetë-rregullues.... çështja kryesore që mbetet, është se përse ligji duhet të obligojë vetë-rregullimin.... po ashtu, revokimi i licencës mund të bëhet shumë lehtë. Nga ana tjetër, dispozitat mbi monitorimin dhe të drejtën e dhënë për këtë qëllim, janë ende të tepruara dhe rrezikojnë të kenë efekt negativ mbi median....
Ligji nuk ka ndryshuar asgjë mbi kufizimet e pronësisë, ndërkohë që të tepruara mbeten edhe kufizimet mbi transmetimin e muzikës kombëtare dhe programeve.
Një nga shqetësimet kryesore që lidhet me dispozitat për agjencinë rregullatore është se ky organ nuk ka përfshirje të mjaftueshme të shoqërisë civile në procesin e emërimit. Edhe lidhur me dispozitat për shërbimin e transmetuesit publik, nevojitet më shumë përfshirje e sektorit civil në Këshillin drejtues të këtij shërbimi.
OSBE-ja komenton edhe definicionin e gazetarit, i cili në ligjin e ri mbetet ende i rrezikuar. Semra Jakupi
