Komisioni për Verifikimin e Fakteve vazhdon lustrimin e anëtarëve të Akademisë së Shkencave dhe Arteve. Në seancën e sotme të komisionit, akademiku dhe poeti maqedonas Bozhin Pavllovski u shpallë bashkëpunëtor i shërbimeve sekrete. Dosja e Pavllovskit u rikthye për të dytën herë në tavolinën e komisionit lustrues, edhe pse herën e parë ishte shpallur i pastër. Anëtari i Komisionit për Lustrim Çedomir Damjanovski theksoi se Komisioni nuk ka siguruar materiale të reja, që është kusht për rihapjen e procedurës për lustrim, për një të lustruar më parë.
"Sot përsëri shqyrtuam dokumentet për një person, edhe madje dokumentet e njëjta, pa dokumente të reja dhe u miratua vendim se ky person ka qenë bashkëpunëtor i shërbimeve. Për herë të parë ai u lustrua para një viti. Atëherë morëm vendim se nuk kishte elemente të mjaftueshëm për ta shpallur si bashkëpunëtor. Ata thonë se ka dokumente të reja, unë them se nuk ka asnjë dokument të ri, ato janë dokumente për të cilat kemi debatuar një herë më parë", tha Çedomir Damjanovski, anëtar i KVF-së.
I lustruari Pavllovski duhej të ishte në rend dite që para dy ditësh, por shqyrtimi i dosjeve të tij ishte shtyrë për sot. Pikërisht para dy ditësh ai iu drejtua me letër të hapur kryeministrit Nikolla Gruevski.
"Pastrimin e artistëve, shkencëtarëve dhe publicistëve çdoherë e zbatojnë mendjelehtët e paguar mirë. Fillojnë me shaka të hidhur edhe pse në fund përfundojnë në plehrat e historisë. Revanshizmi është proces gjakpirës në të cilin nuk vuajnë vetëm politikanët e çmendur por të pafajshmit dhe të dobëtit, gratë dhe fëmijët. Duke braktisur institucionet që i kontrollon regjimi aktual, me qetësin e plotë personale ju informoj se në vendlindjen e dytë në mënyrën më të bukur do vazhdoj ta promovoj vendlindjen time të parë", ka shkruar Pavllovski.
Gjatë ditës së djeshme Pavllovski dha edhe dorëheqjen nga Shoqata e Shkrimtarëve të Maqedonisë si dhe Akademia e Shkencave dhe Arteve, duke u bërë kështu akademiku i parë që heq dorë nga ky titull. Para dy ditësh, Komisioni shpalli si ish bashkëpunëtor të shërbimeve sekrete edhe akademikun Tome Serafimovski, ish shefin e policisë sekrete Sllobodan Bogoevski, si dhe një ish gjykatës dhe një ish këshilltar. Benjamin Arifi
