Gazetari Tomisllav Kezharovski përballë prokurorisë sot në Gjykatë. Kundër tij dhe 3 të dyshuarve të tjerë është ngritur aktakuzë për vepër penale "ndërmjetësin kundërligjor" në procesin gjyqësor "Oreshe". Megjithatë pala mbrojtëse me shumë vërejtje ka pritur aktakuzën e përgatitur nga prokuroria. Ata thonë se aktakuza është absurde dhe joligjore. Madje sipas mbrojtjes, klientët e tyre po akuzohen për vepër penale e cila nuk ekziston prej vitit 2011.
"Gjithmonë kur një proces fillon me shkeljen e procedurës ligjore kjo vazhdon deri në fund. Edhe më tepër kur kemi të bëjmë me një akuzë absurd të cilën e patë edhe vet. Bëhet fjalë për një konstrukt jo të shëndoshë dhe të jashtëligjshëm, ku në një vend futen edhe njerëz që sipas akuzës kanë tentuar të dëmtojnë të akuzuarit për rastin "Oreshe", edhe njerëz që sipas tyre kanë dashur tu ndihmojnë. Madje patë edhe vet se vepra penale me të cilën ngarkohen të akuzuarit nuk ekziston më", tha Aleksandar Torteski, avokat.
Avokati Torteski shpjegon se mbrojtjes nuk i janë dhënë dëshmitë për shqyrtim, e as urdhrat për masa të veçanta hulumtuese, që të mundet mbrojtja të vlerësojë nëse është respektuar ligji gjatë zbatimit të këtyre masave.
"Siç thotë populli, te Gjykata është edhe forca edhe sëpata. Argumentet dhe mundësitë tona janë shumë të kufizuara. Ne mund të dorëzojmë kërkesa, do të përdorim të gjitha mundësitë ligjore, por në fund gjykata është ajo që vendos, dhe duhet të vendos në bazë të dijes dhe ndërgjegjes së tyre", u shpreh Aleksandar Torteski, avokat.
Tomisllav Kezharovski akuzohet se ka zbuluar identitetin e dëshmitarit të mbrojtur në procesin gjyqësor "Oreshe", që kishte të bëjë me një vrasje të dyfishtë në afërsi të Velesit. Por dëshmitari për të cilin ka shkruar Kezharovski, më pas ka rezultuar i rrejshëm.
Në kohën kur Maqedonia po merr vërejtje serioze për lirinë e mediave, në Gjykatën pas meje ka filluar procesi gjyqësor kundër gazetarit Tomisllav Kezharovski. Bazë për akuzën e Kezharovskit është një artikull i tij i publikuar që në vitin 2008. Nuk është e qartë se pse përndjekja ndaj tij ka filluar me 5 vjet vonesë, pikërisht në periudhën kur Kezharovski po hulumtonte rrethanat e vdekjes së gazetarit Nikolla Mlladenov. Benjamin Arifi
