Vizita e Ahmetit në Athinë është vlerësuar pozitivisht nga ministri i jashtëm Nikolla Poposki i cili konsideron se këto takime janë të dobishme për të gjithë politikanët e vendit që nga afër të dëgjojnë kërkesat e palës greke për kontestin shumëvjeçar rreth emrit. ' Nuk ka asgjë të keqe nëse çdo politikan nga Maqedonia dëgjon nga afër kërkesat e palës greke për problemin e emrit', u shpreh Poposki. Ai i hodhi poshtë pohimet për përjashtimin e ambasadorit të Maqedonisë në Athinë në këto takime pasi siç u shpreh ministri Poposki, vizita e sotme e Ahmetit në Athinë është private dhe se ka protokoll adekuat.
"Fillimisht bëhet fjalë për vizitë në cilësi private dhe në bazë të kësaj edhe protokolli është adekuat për atë kush merr pjesë e kush jo. Sa i përket vizitës së përfaqësuesve politik nga Maqedonia, më duket se është e dobishme që dikush që merret me politik në Maqedoni nga dora e parë t'i dëgjoj kërkesat ose pritjet me të cilat ballafaqohemi nga ana e atyre që e përcaktojnë se sa shpejt dhe në çfarë mënyre mund të anëtarësohemi në NATO dhe BE ashtu që nuk shoh diçka jo të favorshme në atë aspekt. Mendoj se mund të jetë vetëm e dobishme nëse çdokush i dëgjon argumentet dhe arrin që të gjej logjik të caktuar në to", tha Nikolla Popovski, ministër i jashtëm.
Ai nuk përjashton takime me palën greke gjatë Asamblesë së përgjithshme të KB gjatë këtij muaji por se takimet e këtilla deri tani nuk kanë shënuar rezultat. Ministri Poposki vlerëson se nevojitet dialog në nivel kryeministrash për të cilën kërkesë deri më tani nuk ka disponim nga pala greke.
"Ne mbesim të përkushtuar për takime të drejtpërdrejta edhe në Asamblenë e përgjithshme dhe të tjera qofshin ato me ndërmjetësin Metju Nimic apo edhe me vet bashkëbiseduesit nga Athinë. Vlerësojmë se nëse nuk e ngrisim nivelin jemi në situatë që fqinji jonë ti shmanget dialogut thelbësor dhe vazhdimisht të gjej alibi për zvarritjen e procesit . Qëllimi është që ta tejkalojmë këtë sfidë andaj vlerësojmë se nevojitet dialog në nivel politik dhe atë dialog duhet ta ngritim në nivelin më të lartë politik. Deri tash nuk kemi informata se ka disponim nga pala në Athinë", u shpreh Nikolla Popovski, ministër i jashtëm.
Këto komente ministri Poposki i bëri në shpalljen e konkursit për qytetarët e vendit për përfshirjen e tyre në zhvillimin e zgjidhjeve inovative në tre sfera, barazia gjinore, qasja e shërbimeve shëndetësore në viset rurale dhe mënjanimi i mbeturinave elektronike. Fituesit do të shpallen më 24 tetor me rastin e shënimit të 20 vjetorit të anëtarësimit të Maqedoni në KB. Gjyltene Rexhallari
