Ngërçi tregtar mes Shkupit dhe Prishtinës reflektoi papjekurinë e dy qeverive për të menaxhuar problemet e brendshme por edhe mungesën e komunikimit të mirëfilltë politik e ekonomik mes dy vendeve. Analistët Nexhmedin Spahiu dhe Naim Rashiti megjithëse u shprehën të kënaqur nga zgjidhja e krizës, thonë se dy vendet duhej të shmangnin krijimin e një problemi të tillë që solli pasoja si për qytetarët ashtu edhe ekonomitë e tyre.
"Ky është një budallallëk kulmor nga ana e Qeverisë së Kosovës në radhë të parë, më pas edhe të Qeverisë së Maqedonisë. Është mirë që u zgjidh, ishte krejtësisht e panevojshme, një gjë që u kushtoi shumë edhe njërës palë edhe të tjetrës. Mendoj që faji kryesor qëndron tek Qeveria e Kosovës, ajo ka bërë gabimin që nuk duhej ta bënte dhe nuk duhet të ketë një qasje të tillë që para se gjithash i shkakton dëme të mëdha Kosovës", tha Nexhmedin Spahiu, analist.
"Kjo situatë ka treguar që mungon një dialog permanent politik dhe ndërshtetërorë për t'i rregulluar dhe avancuar marrëdhëniet ndërshtetërore. Në tërë rajonin ka shumë pak marrëveshje bilaterale dhe multilaterale. Shumë kanë llogaritur se CEFTA do t'i rregullojë tregun, por tregu nuk rregullohet edhe pa marrëdhënie të mira politike. Kjo dëshmon se situata është ende fragjile në rajon, duhet komunikim më permanent politik, shoqëror mes të dyja vendeve dhe gjithmonë avancuar politikat ekonomike dhe tregtare", deklaroi Naim Rashiti, analist.
Imazhi në pikat kufitare mes Maqedonisë dhe Kosovës, sipas analistëve ngjasonte me ato të para viteve 90-ta,kur qytetarët u nënshtroheshin maltretimeve të ndryshme . Spahiu dhe Rashiti sugjerojnë që qeveritë e dy vendeve të mësojnë nga kjo përvojë e hidhur me qëllim që imazhe të tilla të mos përsëriten në të ardhmen.
"Kjo qasje fare nuk është e dobishme për shtetet e vogla. Kosova dhe Maqedonia janë shtetet më të vogla në dhe të varfra në Evropë. Vetëm një politikë bashkëpunimi, tolerante u ndihmon të ecin përpara kurrsesi një politikë konfliktuoze. Konfliktet në Ballkan edhe për një shtetet të fuqishëm çfarë ka qenë Serbia shihet se si e kanë dobësuar dhe copëtuar e lërë më për shtetet të cilat sapo kanë filluar të ngrihen në këmbë", u shpreh Nexhmedin Spahiu, analist.
"Situata të tilla mund të tensionojnë dhe të krijojnë pasoja më afatgjate. Natyrisht që Kosova jeton nga të hyrat doganore, Maqedonia eksporton shumë mallra në Kosovë por edhe Maqedonia për ta ruajtur tregun duhet të ruajë marrëdhëniet e mira me Kosovën. Fakti që kemi parë në kufi, irritim të qytetarëve, një maltretim të qytetarëve, tendenca për t'i bllokuar kufijtë me kamionë është mentaliteti i para 90-ve. Duket se element politik nuk kanë mësuar nga vitet e 90 nga të gjitha anët dhe duhet mësuar nga kjo", deklaroi Naim Rashiti, analist.
Sipas ekspertëve ngërçi tregtuar 7 ditësh mes Maqedonisë dhe Kosovës shkaktoi pasoja të caktuara. Kompanitë nga Maqedonia që eksportojnë në Kosovë, nga kriza një javore kanë humbur mbi 7 milion euro, ose rreth 1 milion...
