Fëmijët me simptoma të gripit të mos pranohen në shkollë dhe të shërohen në kushte shtëpiake, rekomandojnë autoritetet shëndetësore. Para fillimit të sezonit të gripit, nga Sektori për mbrojtje parandaluese i Ministrisë së Shëndetësisë bëjnë thirrje që institucionet arsimore të mirëmbajnë higjienën në nivel të lartë dhe prindërit t'i këshillojnë fëmijët e vetë që të kujdesen për higjienën personale dhe të ushqehen në mënyrë të shëndoshë.
"Nëse kollitet, teshtinë, ka temperaturë, nuk ndihet mirë, vetë fëmija duhet të paraqitet te kujdestari i klasës ose nëse shoku i tij vëren një gjë të tillë ta paraqesë te kujdestari i klasës, do të thotë ata fëmijë doemos duhet të kurohen në kushte shtëpiake që të parandalojmë mundësinë e përhapjes së infektimit dhe të infektohen edhe persona tjerë", deklaroi Dr. Jovanka Kostovska, udhëheqës i sektorit për mbrojtje parandaluese.
Kompetentët u bëjnë thirrje qytetarëve që me kohë të vaksinohen kundër gripit veçanërisht grupet e rrezikshme si fëmijët e vegjël, gratë shtatzëna dhe personat më të moshuar. Vaksinimi fillon më 15 tetor. Sivjet është paraparë sigurimi i 30 mijë vaksinave të cilat janë trevalente dhe mbrojnë nga gripi i stinorit, gripi i derrit dhe grip i tipit B dhe të cilat janë rekomanduar nga Organizata Botërore Shëndetësore. Rekomandohet mirëmbajtje e higjienës në nivel të lartë me qëllim që të parandalohet edhe përhapja e hepatitit, gjegjësisht verdhëzës në institucionet arsimore. Inspektorë nga Inspektorati shtetëror dhe sanitar në terren do të kontrollojnë nëse shkollat dhe çerdhet janë të pastra dhe të sigurta për fëmijët. Bojana Simonoviq
