Avokatët e 8 të akuzuarve për rastin 'Likuidimi' në seancën e fundit dëgjimore kërkuan lirimin e klientëve të tyre, pasi procesi gjyqësor ka dëshmuar se ata janë të pafajshëm. Sipas tyre, Prokuroria nuk ka arritur të prezantojë asnjë dëshmi rreth akuzave për të cilat ngarkohen 8 të akuzuarit. Avokati i të akuzuarit Ile Tanev tha se ka kërkuar lirimin e klientit të tij, pasi nuk ka prova për asnjërën nga dy veprat penale për të cilët akuzohet Tanev.
"Për sa i përket veprës së parë penale për të cilin akuzohet, mitmarrje, nuk ka asnjë dëshmi as se ka marrë para dhe se dikush t'i ketë ofruar atij para, prandaj ai duhet të lirohet nga akuza. Ndërkaq për sa i përket veprës së dytë penale, shpërdorim detyre, kërkova gjithashtu lirim sepse sipas ligjit, kjo vepër penale nuk është konsumuar", tha Kosta Nojkov, avokat i të akuzuarit Ile Tanev.
Megjithatë Prokuroria Publike ka kërkuar dënime të rrepta për të gjithë të akuzuarit, përfshirë gazetarin Tomisllav Kezharovski. Kezharovski akuzohet vetëm rreth zbulimit të identitetit të dëshmitarit të mbrojtur 'Breza'. Megjithatë avokati i Kezharovskit, Filip Medarski tha se nëse Kezharovski do të dënohej për këtë çështje, kjo do të përbënte kufizim të lirisë së shprehjes. Avokati Medarski kërkoi lirimin e Kezharovskit duke thënë se gazetari nuk ka zbuluar emrin e dëshmitarit të mbrojtur në rastin 'Oreshe' dhe as nuk ka shkaktuar dëm ndaj procesit gjyqësor të tij. Ndërkaq prokurorja publike këmbëngul se Kezharovski e ka zbuluar identitetin e Brezës, me qëllim që të rriste lejueshmërinë e gazetës së tij të re. Prokuroria dhe pala mbrojtëse, sot për herë të fundit ballafaquan argumentet përpara se gjykata të shpallë aktvendimin për rastin 'Likuidimi'. Semra Jakupi
