Pasuria dhe biznesi i Sasho Mijallkovit ishte në fokusin e pyetjeve të sotme të deputetëve. Radmilla Sheqerinska nga LSDM-ja pyeti në mënyrë direkte kryeministrin lidhur me rritjen enorme të pasurisë së drejtorit të Agjencisë për zbulim dhe kundërzbulim. Sheqerinska para deputeteve paraqiti edhe fletë-pronësinë e Mijallkovit të marrë nga ueb faqja e Komisionit Antikorrupsion. Për opozitën ishte e paqartë se si pasuria e Mijallkovit vetëm gjatë 5 viteve të fundit është rritur për 1.6 milion euro. Ndërkohë, Gruevski u përgjigj se është obligim ligjor që çdo funksionar shtetëror të paraqes fletë-pronësinë e tij tek organet kompetente.
"A e din kryeministri i këtij shteti se funksionarë shtetëror mund të paraqesin pronë vetëm për orë dorë dhe stoli ari, besoni apo jo 500 mijë euro, dhe plotësisht 300 mijë euro vetëm për fotografi. Cili është ai biznes në Maqedoni dhe jashtë saj me të cilin merret drejtori i policisë sekrete në Maqedoni dhe të cili i ka mundësuar që për një kohe të shkurtër ta dyfishoj pasurinë e tij. Për çfarë biznesi bëhet fjalë, të cilin udhëheq kushëriri i juaj i parë dhe i cili i mundësoi për një kohë të shkurtë të paraqes pronë shtesë në vlerë prej 1.6 milion euro", tha Radmilla Sheqerinska, LSDM.
"Për të gjitha detajet rreth asaj që e interesojnë zonjën Sheqerinska, duke u nisur nga ajo se ai nuk është prezent këtu në sallë, ai do të përgjigjet në mënyrë adekuate dhe publike. Unë nuk mund të përgjigjem në detaje të cilit do qoftë funksionar në shtet, i cili ka parashtruar flet-pronësi, se si ka ardhur deri te mjetet, si i ka fituar e kështu me radhë. Atë që e di është se një periudhë të gjatë personi i apostrofuar, Sasho Mijallkov kishte biznes privat, para se të hynte në këtë funksion. Por më mirë është personalisht të përgjigjet në këto pyetje të parashtruara", u shpreh Nikolla Gruevski, kryeministër.
"Mendoj se mos-përgjigjja e juaj rreth pyetjes së parë, dhe vendimi i juaj që të heshtni rreth këtyre temave dëshmon se ndoshta opinioni e kritikon Mijallkovin pa të drejtë, shihet qartë se me mbrojtjen e tij nga ana juaj, duket se ai është vetëm rojtari i kasafortës familjare, shfrytëzuesi kryesor, donatori kryesor si duket jeni ju zoti kryeministër", deklaroi Radmilla Sheqerinska, LSDM.
Ndryshe institucioni pyetje deputetësh nga sseanca në seancë po devalvohet gjithnjë e më shumë, sot seanca filloi me 51 minutë vonesë dhe atë me përgjigjet me shkrim të deputetëve të mazhorancës. Lidhur me këtë reaguan nga opozita duke theksuar se bëhet fjalë për pyetje të porositura, pas të cilave pasonin përgjigje të gjata të ministrave. Ndërkohë deputeti i PDSH-së Bekim Fazliu, në shenjë proteste, pyetjet të cilat i parashtroi nuk ia drejtoi askujt nga kabineti qeveritar. Bedri Rexhallari
