Përjashtohen rreth 20 kandidatë shqiptarë për policë të cilët ishin pranuar në konkursin e vitit të kaluar. Me largimin e kandidatëve shqiptarë ka rënë përfaqësimi i shqiptarëve nën 20 për qind. Jo zyrtarisht mësohet se këtë trajnim e kanë kaluar vetëm rreth 50 shqiptarë e jo 75 siç ishte marrëveshja e partnerëve të koalicionit. Të dhëna të sakta për përfaqësimin, MPB-ja ka vetëm për maqedonasit të cilët janë përfaqësuar me 73.9 për qind. Sipas zëdhënësit të policisë Ivo Kotevski, të gjitha bashkësitë tjera etnike janë përfaqësuar me 26.1 për qind, por pa saktësuar se sa prej tyre janë shqiptarë. Madje edhe ministrja e brendshme Jankullovska pranoi se të gjithë kandidatët e pranuar vitin e kaluar, nuk kanë arritur të kalojnë të gjitha trajnimet, por pa precizuar se bëhet fjalë vetëm për kandidatë shqiptarë.
"Mbi 90% prej jush arritët të realizojnë me sukses të madh trajnimin edhe përkundër kritereve rigoroze, vetëm 12 kandidatë prej atyre që e filluan trajnimin nuk e përfunduan", deklaroi Gordana Jankullovska, Ministre e Brendshme.
Kujtojmë se vitin e kaluar kur edhe ishin pranuar kandidatët, partnerët e koalicionit BDI-VMRO DPMNE ishin marrë vesh që për të ruajtur përfaqësimin e shqiptarëve të pranohen 75 policë shqiptarë.
Ndërsa policët e rinj të cilët sot i morën vendimet për trajnimin e përfunduar u shprehën të kënaqur edhe përkundër vështirësive të cilat i kanë kaluar gjatë trajnimit.
"Si vet pjesëmarrës në këtë kurs kemi kaluar sfida të rënda gjatë gjithë këtij viti por gjithsesi ka mbaruar siç duhet me sukses. Si vet kursist I këtij kursi sot mbaroi dita përfundimtare u sugjeroj që të konkurroj dhe të përgatiten mirë për sfidat e ardhshme", tha Gëzim Aliu, Polic
"Nuk kishte dallime, të gjithë ishim të barabartë, nuk kishte gjini femërore dhe mashkullore, të gjithë u treguam në mënyrën më të mirë", u shpreh Andrijana Kostadinoviq, Police.
Të gjithë policët e pranuar në këtë konkurs me punë pritet të fillojnë nga dita e nesërme. Ata do të shpërndahen nëpër të gjitha stacionet policore në Maqedoni. Gjyltene Rexhallari
