Partia Liberale propozon një projekt ligj i cili do të ndalonte përdorimin e simboleve të pranishme në flamurin shtetëror para arritjes së Marrëveshjes së përkohshme mes Maqedonisë dhe Greqisë në 1995. Bëhet fjalë për simbolin e Diellit të Virginës. Sipas Veliçkovskit, projekt/ligji do të ndihmojë në përmirësimin e marrëdhënieve ndër-fqinjësore dhe do të paraqesë një hap përpara në negociatat rreth emrit.
"Me propozimin tonë arrihen dy efekte. E para, përmbushen obligimet që Maqedonia ka marrë me nënshkrimin e Marrëveshjes së Përkohshme, dhe e dyta propozim ligji do të nxisë bashkëpunimin ndërfqinjësorë dhe mund të ndihmoj edhe në normalizimin e raporteve mes dy vendeve si dhe zgjidhjen e kontestit rreth emrit, që paraqitet si pengesë në rrugën drejt proceseve euro-atlantike", tha Ivon Veliçkovski, kryetar I PL-së.
Propozimi i Veliçkovskit mori menjëherë mbështetjen e RDK-së së Osmanit. Sipas Naxhi Xhelilit, në rast të shndërrimit në ligj, ky draft do të parandalonte përkeqësimin e raporteve me fqinjin jugor.
"Ne si Rilindje Demokratike Kombëtare do të përkrahim një propozim/ligj të tillë me të cilin është momenti i fundit që kësaj qeverie apo kësaj shumice t'i ndalohet përdorimi i shumë simboleve të cilat kontribuojnë në përkeqësimin edhe ashtu të marrëdhënieve të përkeqësuar ndërmjet Republikës së Maqedonisë dhe Republikës së Greqisë dhe pse jo në drejtim të evitimit të të gjitha pengesave të cilat nesër do t'i shfrytëzonin si alibi edhe fqinjët tanë të tjerë siç janë Republika e Bullgarisë po pse jo edhe Serbia", tha Naxhi Xhelili, deputet i RDK-së.
Nga LSDM-ja shprehen se akoma nuk e kanë parë propozim/ligjin në fjalë dhe se, rreth tij do të shprehen në ditët në vijim. Bedri Rexhallari
