Asnjë komandant policie e as zv/ komandant apo udhëheqës turni shqiptar në burgjet e Shkupit. Si në Idrizovë ashtu edhe në Shutkë, shqiptarët janë vetëm në nivel të policëve të thjeshtë, edhe aty shumë pak të përfaqësuar. Madje, sipas informatave që ka siguruar televizioni Alsat, në burgun e Shutkës nuk ka asnjë shqiptar të punësuar as në mesin edukatorëve. Pozita e vetme më e lartë në të dyja burgjet është zv/ drejtori i burgut, pozitë e cila ka pak kompetenca në menaxhimin e burgjeve. Edhe mes policëve të thjeshtë, në këto dy burgje, përfaqësimi i shqiptarëve është nën nivel. Në burgun e Idrizovës ka vetëm 33 shqiptarë nga 257 të punësuar, ose 12,8%. Në Burgun e Shutkës, vetëm 19 shqiptarë nga 122 të punësuar, ose rreth 15 për qind. Ministri i Drejtësisë Blerim Bexheti, nën kompetencë të së cilit janë burgjet e Maqedonisë, nuk deshi të prononcohej sot për televizionin Alsat lidhur me gjendjen e tillë të përfaqësimit adekuat në burgje. Aspak më mirë nuk është as gjendja edhe në burgjet jashtë Shkupit. Në burgun e Kumanovës, i cili u inaugurua në fund të shtatorit, nuk ka të punësuar asnjë shqiptar. Kohë më parë këtë e pranoi edhe vetë ministri.
"Përfaqësimi thuajse nuk ekziston, por gjithsesi shfrytëzoj rastin që të informoj opinion se do të ndërmerren të gjitha aktivitetet që të përmirësohet përfaqësimi në burgun e Kumanovës", deklaroi kohë më parë Blerim Bexheti, Ministër i Drejtësisë.
Edhe në burgjet e tjera nëpër Maqedoni, shqiptarë mund të gjesh tek-tuk. Në Ohër janë të punësuar vetëm 3 shqiptarë ose rreth 8 për qind nga të punësuarit gjithsej ndërsa në Manastir, 4 të punësuar shqiptarë ose 7,7 për qind. Në 5 burgjet e tjera në Maqedoninë Lindore nuk ka asnjë të punësuar shqiptar. Gjithsej në burgjet e Maqedonisë janë të punësuar vetëm 12,7 për qind shqiptarë, kundrejt 84,7 për qind të të punësuarve maqedonas, shifër kjo që është shumë larg parimit të përfaqësimit të drejtë dhe adekuat të bashkësive etnike siç garanton kushtetuta. Benjamin Arifi
