Personat me nevoja të posaçme nuk kanë mundësi të barabarta si gjithë të tjerët. Ata ballafaqohen me pengesa të shumta që iu pamundësojnë të shkollohen dhe punësohen. Kështu u shprehën nga Këshilli nacional i personave me aftësi të kufizuara në shënimin e ditës ndërkombëtare të kësaj kategorie njerëzish, që sipas tyre nevojitet të integrohen më tepër në shoqëri.
"Qasja tek institucionet, tek ueb sajtet e internetit, tek teknologjia elektronike, dhe informatat janë hallka më e rëndësishme që mungon, për shkak se prej këtu fillojnë të gjitha problemet tek personat me nevoja të posaçme. Mungesa e qasjes i pamundëson atyre të edukohen, punësohen dhe inkuadrohen njësoj në shoqëri", tha Branimir Jovanovski, Këshilli nacional i personave aftësi të kufizuara.
"Jo vetëm këtë ditë që është e një rëndësie të veçantë për Këshillin nacional të personave me aftësi të kufizuara, dhe të gjitha organizatat e tjera nacionale, por edhe çdo ditë të vitit duhet të japim maksimumin tonë për të kërkuar mënyra se si t'ua lehtësojmë jetën personave me nevoja të posaçme", u shpreh Dime Spasov, ministër i Punës dhe Politikës Sociale.
3 Dhjetori u shënua edhe në Universitetin Shtetëror të Tetovës. Katedra e Edukimit special dhe rehabilitimit në bashkëpunim me Fakultetin Filozofik organizuan një seminar me nxënësit dhe studentët me nevoja të posaçme duke demonstruar gjuhën e shenjave.
"Defektologjia ose edukimi special institucional për edukimin dhe rehabilitimin e personave me aftësi të kufizuara por edhe futjen e tyre ne sistemin e rregullt social dhe te mbrojtjes shëndetësore nxiti nevojën për hapjen e këtij program studimor dhe këtë edukim special dhe rehabilitim...", deklaroi Fatbi Osmani, dekan i fakultetit filozofik.
Dita ndërkombëtare e personave me aftësi të kufizuara për herë të parë është shënuar në vitin 1992 nga Kombet e Bashkuara, organizëm që përpiloi edhe konventën për mbrojtjen e të drejtave të kësaj kategorie, në nivel botëror. Ferikan Iljazi
