TIRANË -- Vazhdon përplasja e ashpër mes Këshillit të Lartë të Drejtësisë dhe ministrit të Drejtësisë Nasip Naço.
Përmes një njoftimi për shtyp Këshilli i Lartë i Drejtësisë reagoi sot ashpër duke i konsideruar si jo serioze deklaratat e ministrit të Drejtësisë, Nasip Naço lidhur më procedimin disiplinor për shtatë gjyqtarë.
"Asnjë nga procedimet e cituara nuk ka arritur zyrtarisht në protokollin e KLD deri ditën e djeshme kur, vetëm një nga kërkesat e deklaruara nga Ministri i Drejtësisë për procedim disiplinor është regjistruar"- sqarohet në njoftimin e shtypit të këtij institucioni të drejtuar nga Presidenti Bujar Nishani.
Në Këshillin e Lartë të Drejtësisë thuhet se ka mbërritur vetëm një kërkesa për procedimin disiplinor vetëm për një gjyqtar ndërkohë që asnjë nga kërkesat për procedim për 6 gjyqtarët e tjerë ende nuk është dorëzuar në protokollin e këtij institucioni.
"KLD e konsideron aspak serioze që ai të vihet në dijeni për fatin e kërkesave për procedim disiplinor ndaj gjyqtarëve nëpërmjet mediave dhe jo në rrugë institucionale, sikundër ligji parashikon!", thuhet në njoftimin e KLD-së të bërë publikë në faqen zyrtare në internet të këtij institucioni.
