Nuk ka ende përgjigje nga Agjencia për Komunikime Elektronike lidhur me numrin e punonjësve shqiptarë në këtë institucion, dhe sa prej tyre janë në funksione drejtuese. Televizioni Alsat M dërgoi kërkesë me shkrim, që javën e kaluar për informata tek Kamalija Vrangallova, personi i ngarkuar për komunikime me mediat. Por, pasi Vrangallova nuk ishte në vendin e punës, morëm porosi automatike nga e-maili i saj zyrtar, që pyetjet t'i dërgojmë tek kolegia e saj Biljana Gavrilova. Alsat M të njëjtat pyetje javën e kaluar i dërgoi edhe Gavrilovës, por as ajo nuk përgjigjet. Sot nga Agjencia për komunikime elektronike na treguan se një person tjetër është vendosur për komunikimet me mediat, Vlladimir Ristevski dhe se të gjitha përgjigjet duhen kërkuar prej tij. Pyetjet rreth numrit të të punësuarve shqiptarë në këtë Agjenci dhe sa prej tyre kanë funksione udhëheqëse, ia dërguam edhe Ristevskit, por deri në orët e pasdites nuk morëm përgjigje zyrtare as nga ai, edhe pse në bisedën telefonike të mëhershme, ai premtoi përgjigje. Ndërkaq, sipas të dhënave që ka siguruar ALSAT, në Agjencinë për Komunikime Elektronike ka 130 persona të punësuar. Nga faqja zyrtare e internetit ku përmenden sektorët dhe shërbimet si dhe të punësuarit në to, mund të shihet se në kryerjen direkte të veprimtarisë së Agjencisë janë të përfshirë 93 persona. Prej tyre, vetëm 6 janë shqiptarë, një përqindje kjo prej 6,45 %. Megjithatë, për numrin zyrtar rreth përfaqësimit të drejtë nuk mund të flitet sepse Agjencia vazhdon të heshtë. Sipas të dhënave jozyrtare, përfaqësimi i shqiptarëve në tërë Agjencinë sillet rreth 10%. Këto shifra janë larg kornizës së parashikuar me Marrëveshjen e Ohrit, që u konstatua edhe në raportin e vitit të kaluar nga Avokati i Popullit. Natasha Stojanovska
