BERAT - Është konsideruar si mushkria e qytetit të Beratit, por vitet e fundit ka rënë pre e zjarreve duke humbur me mijëra rrënjë pishash. Kodra mbi lagjen "Goricë" në Berat ka nisur të ripyllëzohet nga Ndërmarja e Pyjores në këtë qytet, ndërkohë që kjo nisëm sensibilizuese ka përfshirë dhe nxënësit e shkollave për të vijuar më pas në të gjitha kodrat e qytetit. Inxhinieri i ndërmarrjes së pyjores Fatos Nako thotë se aksione të tilla eliminojnë erozionin e tokës dhe rënien e gurëve në akset nacionale.
"Kjo është më e ndjeshme nga ana qytetare pasi është mushkëria e qytetit. Duke bërë ripyllëzim, ne eliminojmë edhe erozionin e tokës apo rënien e gurëve në rrugë", u shpreh Inxhinieri i Ndërmarrjes Pyjore, Fatos Nako.
Dhjetori është përcaktuar si muaji kushtuar ripyllëzimit, ku me fondet e saj ndërmarja pyjore ka nisur punën për të rikthyer gjelbërimin në shumë zona të degraduara në vend. Ky aksion do të shtrihet edhe në shkolla për të shtuar gjelbërimin në oborret e tyre me mbjelljen e fidanëve të rinj.
