Edhe dy muaj pas publikimit të lajmit për gjendjen e vështirë me pullazin e shkollës fillore "Ismail Qemali" në fshatin Nerasht, ende asnjë ndërhyrje nga Ministria e arsimit, përveç dërgimit të një ekip për verifikimin e gjendjes, por ekipe të tilla janë dërguar edhe më parë megjithatë gjendja mbetet e pandryshuar. Drejtori i Shkollës, Azir Mustafa, ka alarmuar edhe një herrë Ministrinë dhe organet tjera kompetente për pasojat e mundshme për nxënësit nëse vazhdojnë të injorojnë këtë problem serioz.
"Pas publikimit të lajmit në Alsat se gjendja e kulmit të shkollës është në gjendje katastrofale dhe rrezikohet të bjere kulmi, nga ministria kanë ardhur një ekip inxhinierësh për ndërtim dhe premtuan se kulmi do të rregullohet dhe më tepër asgjë ska prej saj. Kërkesa ime është e hapur dhe unë e kam përgjegjësi morale që ti alarmojë se kulmi i shkollës është në gjendje kritike dhe po që se bie borë kulmi rrezikon të bjerë. Ka mbi 200 nxënës dhe po që bie kulmi do kemi viktima që nuk e dëshiroj këtë prandaj i iki kësaj dhe alarmoj me kohë se unë kam përgjegjësi për këtë. Sepse po që se shkatërrohet kulmi dhe bjerë, do prishet i tërë objekti dhe kushtojë sa pesëfishi i kësaj të tanishmes, sepse, shiu dhe uji rrjedhin brenda dhe e prishin poshtë krejt", u shpreh Azir Mustafa, drejtor i Sh.F. "Ismail Qemali".
Duke parë neglizhencën e institucioneve për problemin në fjalë Aziri ka ndërmarrë një iniciativë private që të aplikojë me një projekt nëpër të gjitha shoqatat e vendit dhe të huaja, me qëllim që të sigurojë mjete për këtë problem.
"Kam aplikuar në Zvicër në Gjermani tashi edhe një shoqatë amerikane quhet Liga Kros me të cilën bashkëpunoj gjatë kohë, ata shpresoj se do e financojnë por do ta financojnë dhe e financojnë është dallim i madh", tha Azir Mustafa, drejtor i Sh.F. "Ismail Qemali".
Ndërkohë, prindërit e nxënësve janë kërcënuar me bojkotin e mësimin nëse nuk ndërmerren masa të menjëhershme për rregullimin e kulmit te shkollës që në çdo moment rrezikohet nga shembja. Bashkim Sulejmani
