VLORE- Një banore e zonës së Skelës ku ndodhi shpërthimi i makinës së kryekomunarit Fredo Berberi mesditën e djeshme në bulevardin "Ismail Qemali" ka parë me sytë e saj ngjarjen.
Në një prononcim ekskluziv për A1 Report ajo tregon se ka parë si makina ka lëvizur 30 metra pas shpëthimit dhe është përplasur me mjetet e tjera. Dëshmitarja, e cila nuk dëshiron të idenfikohet thotë se ndihet e tronditur për shkak të këtyre ngjarjeve, të cilat siç thotë ajo nuk kanë ndodhur as në 1997.
"Dëgjova shpërthimin e madh. U trondita. Të gjithë njerëzit vraponin nga befasia dhe më pas u tërhoqa se isha e tronditur. Njerëzit që kanë dyqanet këtu pranë u afruan për t'i dhënë ndihmën e parë. Nga shpërthimi makina bëri 30 metra më tutje dhe goditi dis makina të tjera. U dëgjua një zhurmë e madhe. Doli tym i madh. Njerëzit vajtën të shikonin por nuk mund t'i jepnin ndihmë para se të vinte policia. Makina ka qenë tek pallatin në formë L-je dhe më pas ka bërë 30 metra më tutje. Makina duhet të ketë qenë duke ecur dhe ka ecur për inertësi të shpërthimit. Na vjen keq pse të ndodhi gjëra të tilla në mes të qytetit. Gjëra të tilla kaq të frikshme nuk kanë ndodhur as në 1997"- thotë dëshmitarja.
