Ringjallja e PPD-së nuk do të ofrojë alternativë të mirëfilltë për skenën politike shqiptare. Analistët politik vlerësojnë se riaktivizimi i partisë lidhet me përmbushjen e ambicieve personale të figurave të caktuara politike dhe jo për t'i kontribuar hapësirës demokratike.
'Ajo që është tragjike sipas meje është riciklimi i partive të cilat kanë përfunduar në koshin historik. Andaj ky lloj riciklimi flet për krizën e përgjithshme në të cilin gjendemi ne si elektorat, shqiptar dhe qytetarë të këtij vendit. Rikthimi i PPD-së nuk do të ofrojë asgjë të re dhe është një zhgënjim pikërisht atyre njerëzve, iniciatorëve se do të rikthehet fama apo nami i vjetër', tha Xhelal Neziri, analist.
Sipas analistit Albert Musliu thirrjet në emocionet e të kaluarës dhe obligimet morale për ringjalljen e PPD-së nuk qëndrojnë sepse ish kuadrot e kësaj partie tashmë janë të shpërndarë në 3 partitë aktuale të përfaqësuara në parlament.
'Jam skeptik se do të ketë ndonjë sukses që do të mund të shqetësoj subjektet e etabluara parlamentare në Maqedoni... PPD-ja nuk është subjekt i ri i cili mund të thirret në vizione dhe drejtime të reja. Prapë se prapë është një subjekt i vjetër i cili i ka mangësitë që i kanë edhe subjektet ekzistente. Prandaj nuk ka diçka që të mund të sulmojë subjektet ekzsitente politike ndërsa nëse kthehet në historinë e vetë disa prej atyre gabimeve vetë nuk i ka bërë', deklaroi Albert Musliu, analist.
Sipas Musliut dhe Nezirit madje zënkat dhe përçarjet rreth kreut të partisë që u shkaktuan që nga dita e parë e riaktivizimit të tij, dëshmojnë se ky subjekt politik rikthehet e pa reformuar dhe me po të njëjtat probleme të brendshme të cilat çuan në shuarjen e partisë rreth 8 vjet më parë. Analistët vlerësojnë se shqiptarët kanë nevojë për një subjekt të tretë politik që do të ofrojë alternativa dhe zgjidhje të problemeve reale të qytetarëve, të pakorruptuara dhe që do të udhëhiqen nga arsyeja dhe jo emocionet. Semra Jakupi
