Banka Evropiane për Rindërtim dhe Zhvillim do të ndajë kredi prej 75 milion eurosh për zbatim të projekteve të efikasitetit energjetik, të cilat mund t'i shfrytëzojnë të gjitha shtetet e Ballkanit Perëndimor. Për projekte të tilla mund të konkurrojnë firma, institucione shtetërore dhe komuna. Nga java e ardhshme, nëpër odat ekonomike dhe tek afaristët më të vegjël jashtë Shkupit, do të mbahen prezantimet për mundësitë për kredi.
"Nëse aprovohet një kredi në vlerë prej 1 milion euro, 100 mijë euro do të jenë grant nga Banka për kompaninë. Ndërsa komunat të cilat do të aplikojnë për linjë kreditore nga Banka Evropiane për Rindërtim dhe Zhvillim do të kenë grante prej 10 deri në 15 %. Kjo do të thotë se çdo komunë që fiton apo i aprovohet kredia në vlerë prej 1 milion eurosh, 150 mijë euro do t'i ketë grant", tha Valon Saraçini, ministër i ekonomisë.
Saraçini iu bëri thirrje të gjitha komunave që kanë projekte për efikasitet energjetik, të aplikojnë për këtë kredi pasi momentalisht ka vetëm një aplikacion dhe 4 kërkesa nga subjekte private. Kreditë do të merren përmes bankave komerciale. Ferikan Iljazi
