TIRANE- Ndonëse qeveritë shqiptare dhe maqedonase mohojnë të ketë një marrëveshje për devijimin e lumit të Radikës, ambientalistët thonë se kanë informacion se në të vërtetë dy qeveritë po punojnë ngushtësisht për këtë projekt. Ata kërkojnë nga qeveria aktuale që të mos pranojë të devijojë asnjë pikë ujë nga lumenjtë shqiptarë.
Ambientalistët kanë bërë publik edhe një dokument që sipas tyre, Koorporata Elektroenegjitike e Maqedonisë, ELEM, informon komunën e Dibrës së Madhe për përfitimet konkrete që do të kenë nga ky projekt.
Më konkretisht në këtë letër informuese thuhet se nga ky projekt do të merren rreth 70.3 milionë metër kub ujë në vit dhe do të prodhohen 159 milionë gigavat orë energji.
Po ashtu në letrën informuese të ELEM-it maqedonas renditen edhe përfitimet nga projekti i ndërtimit të HEC-it të fushës së Lukovës. "Me marrjen e 70.3 mln metra kub ujë në vit do të stabilizohet minimumi biologjik i lumit Vardar, si dhe një seri benefitesh të tjera nga shfrytëzimi i centraleve të tjera që do të ndërtohen përgjatë lumit Vardar", thuhet në letrën informuese dërguar Dibrës së Madhe.
