TIRANË - Vëllai i kryetarit të Bashkisë së Roskovecit, Eugen Çaushi bashkë me 27 persona është vënë në pranga gjatë natës duke u gdhirë dita e sotme në një megaoperacion të policisë shqiptare dhe asaj italiane.
Operacioni ka shkatërruar një organizatë që merrej me trafikun e femrave dhe të drogës në disa qytete të Italisë.
Gjatë aksioni në Shqipëri janë arrestuar 8 persona, ndërsa një tjetër është shpallur në kërkim.
Burime nga Policia e Shtetit kanë bërë të ditur për Shqiptarja.com se, në pranga janë vënë 28 persona, mes të cilëve është edhe Eugen Çaushi, vëllai i kreut të Bashkisë së Roskovecit. Ky i fundit është vënë në pranga në Tiranë, ndërsa një person tjetër është vënë në pranga në Fier.
Burime për Shqiptarja.com kanë bërë të ditur se, gjatë natës Çaushi kishte qenë në Fier dhe dikush e kishte lajmëruar për operacionin që po kryhej dhe ai do të arrestohej. Në këtë kohë, ai ka tentuar të largohej por është vënë në pranga nga uniformat blu në Tiranë.
Në këtë operacion kanë marrë pjesë karabinierë të Torinos, Firences, Lodit, Alessandria dhe Pavias, të cilët bashkë me policinë shqiptare kanë shkatërruar organizatën kriminale, që trafikonte femrat për ti shfrytëzuar si prostituta si dhe lëndë narkotike që shitej në qytete të ndryshme të Italisë.
Hetimet janë bërë nga prokuroria e Milanos, që ka nxjerrë në dritë dy organizata kriminale të lidhura me njëra-tjetrën. Njëra e kishte bazën në Milano dhe merrej me shfrytëzimin si prostituta të femrave nga Europa Lindore. Ndërsa organizata tjetër merrej me trafikun e lëndëve narkotike, që transportohej në Itali nga Shqipëria.
Gjatë aktivitetit investigues të prokurorëve janë zbuluar edhe pergjegjësit dhe bazat për trafikun e femrave dhe të drogës në Shqipëri dhe në Greqi. Mediat italiane raportojnë se janë dashur 1 vit hetime për të dokumentatuar aktivitetin dhe vënë në pranga pjesëtarët e bandës së prosticionit.
Aksioni është zhvilluar pak ditë pasi në kryeqytetin Italian, Romë ishte edhe drejtori i Policisë së Shtetit, Artan Didi që nënshkroi një marrëveshje me homologun e tij, Alessandro Pansa.
30-vjeçari Eugen Çaushi është arrestuar disa muaj më parë nga policia e Fierit, pasi në fushatën elektorale të zgjedhjeve më 23 qershor të vitit të kaluar ky person dhunoi kandidatin e FRD-s, Mitat Hoxha.
