Dhjetëra punëtorë të administratës komunale të Tetovës kanë protestuar kundër uljes së pagave për afro 15 % nga komuna. Në shenjë revolte, ata bllokuan sot edhe hyrjen e Komunës.
"Arsyeja e daljes në protestë është marrja e të drejtës së punëtorëve për sa iu përket kompensimeve lidhur me marrëdhëniet e punës...në rastin konkret kemi kompensimin për ushqim, si dhe kompensimin për rrugë. Arsyet i di edhe kryetarja e komunës. Ne kemi pasur edhe diskutime që të mos merret një hap i tillë, i cili nuk është ligjor. Por është qëndrimi i asaj. Unë mendoj se ajo nuk ka bë mirë", u shpreh Adnan Neziri, punonjës.
Për kryetaren e komunës, ulja e rrogave është bërë në përputhje me ligjin dhe nismës për reduktimin e shpenzimeve.
"Komuna e Tetovës ka marrë vendim për të harmonizuar pagesat e punonjësve të komunës, në mënyrë krejtësisht ligjore duke u bazuar në raportin e Entit Shtetëror për Revizion të vitit 2009. Duke qenë se komuna e Tetovës dëshiron të funksionojë në bazë të ligjit, absolutisht ne kemi vendosur që këtë qëndrim të Entit Shtetëror për Revizion", deklaroi Teuta Arifi, kryetare e Komunës së Tetovës.
Rreth 90 punëtorët që dolën sot në protestë kërcënuan se nëse komuna nuk e tërheq vendimin, do të vazhdojnë protestat si dhe të mbajnë të mbyllur hyrjen kryesore të komunës. Bashkim Sulejmani
