Ministria e Pushtetit Lokal ka reaguar kundër keqinterpretimit të Ligjit për përdorimin e gjuhëve nga ana e Qytetit të Shkupit. Sipas Ministrisë, Ligji është i qartë dhe obligon Qytetin e Shkupit të përdor zyrtarisht gjuhën e komunitetit mbi 20% që jeton në territorin e Shkupit, në këtë rast të komunitetit shqiptar. Pushteti Lokal edhe zyrtarisht i ka tërhequr vërejtjen që t'i kthejë mbishkrimet shqip në tabelat udhërrëfyese dhe mbishkrimet.
"Ministria e Pushtetit Lokal vlerëson se qyteti i Shkupit bën keqinterpretim dhe shkelje të ligjit për pushtet lokal , i cili në mënyrë decide bën zyrtarizimin e përdorimit të gjuhës shqipe në nivel të qytetit të Shkupi , që do të thotë se përdorimi i gjuhës shqipe në punën e institucioneve në nivel të qytetit është obligim ligjor dhe çdo mospërdorim është shkelje ligjore", thuhet në reagimin e Ministrisë së Pushtetit Lokal.
Qyteti i Shkupit ka zbatuar prej kohësh dygjuhësinë, si në tabelat udhërrëfyese ashtu edhe në godinën e vetë Qytetit. Kjo shihet edhe në tabelat e shumta nëpër qytet, të vendosura më herët. Për Ministrinë e Pushtetit Lokal është e habitshme ndryshimi i tillë i qëndrimit të Qytetit të Shkupit për dygjuhësinë. Por, ndryshimin e tillë BDI-ja e komenton si përgjigje të VMRO-së ndaj kërcënimit të tyre për bojkot të zgjedhjeve presidenciale, nëse nuk pranohet kandidati konsensual. Ka reaguar edhe PDSH-ja me kërkesë zyrtare në Qytetin e Shkupit, që përdorimi i gjuhës shqipe të jetë pikë e rendit të ditës në seancën e radhës të Këshillit të Qytetit. Këshilltari i PDSH-së në Qytetin e Shkupit Idriz Orana kërkon sqarim nëse kufizimi i përdorimit të gjuhës shqipe është marrëveshje mes VMRO-së dhe BDI-së. Ndryshe, mos përdorimi i gjuhës shqipe nga personat zyrtarë sanksionohet edhe me Kodin Penal të Maqedonisë, edhe atë me burg prej 6 muaj deri 5 vjet. Benjamin Arifi
