Shefi i diplomacisë greke Evangeliz Venizelos gjatë vizitës së nesërme do t'i porosis autoritet e Shkupit se çështja e emrit nuk është thjesht një mosmarrëveshje, por detyrim i Maqedonisë për të dhënë prova në drejtim të fqinjësisë së mirë. Në një intervistë për televizionin shqiptar ABC, të realizuar përpara turit të tij ballkanik, Venizelos ka deklaruar se do t'a rikujtojë Shkupin Zyrtar se çështja e emrit nuk është pengesa e vetme për anëtarësim në BE, por se vendi duhet të përmbush të gjithë kriteret e nevojshme sikurse vendet e tjera kandidate.
"Ne kemi bërë një ndryshim jashtëzakonisht të madh nga qëndrimi ynë: Greqia nuk pranonte përdorimin e emrit "Maqedoni". Tani e pranon përdorimin e këtij emri, por me një përcaktim gjeografik, për të qenë e qartë se ky vend ndryshon nga rajonet greke që quhen "Maqedoni". Do të më lejoni të them, edhe rajone nga Bullgaria, edhe nga Shqipëria, sepse edhe Shqipëria ka një pjesë të Maqedonisë. Atëherë, ekziston një detyrim për një përcaktim gjeografik. Përcaktim në raport me emrin Maqedoni, jo me termin "republikë", që ka të bëjë me gjithë vendet e botës", tha Evangeliz Venizelos, Ministër i Jashtëm i Greqisë.
Opinioni në vend shprehet skeptik se vizita e Venizelosit do të do të shkrijë akujt mes Shkupit dhe Athinës. Njohësit e marrëdhënieve ndërkombëtare theksojnë se megjithatë Venizelos do të shmang trumbetimin e pozicioneve greke, pasi vendin e viziton në cilësi të kryesuesit të BE-së.
"Do të kujdeset të mos bëjë ndonjë gafë, ndonjë gabim në kuptim të favorizimit të madh të Maqedonisë sepse nga ana tjetër e presin kritika të ashpra të partive ekstremiste në Greqi.Edhe Maqedonia do të jetë në një pauzë apo në heshtje rreth çështjes së emrit, në një kontkest të tillë nuk mund të presim asgjë tjetër përveç se të sillemi si mikpritës të mirë, të mos nxisim incidente", deklaroi Nano Ruzhin, ish ambasador i Maqedonisë në NATO.
"Jo që nuk ka disponim të zgjidh një çështje që vetë e imponoi ajo si duket vazhdon me montazhe dhe shantazhime, me diskualifikime dhe me nacionalizëm ta satanizojë një vizitë të tillë, gjë që është shumë në dëm të Maqedonisë. Unë nuk jam optimist se ky pushtet ka vullnet politik të zgjidh emrin sepse atë e ka një maskë nga e cila fshihen shumë çfarë që kanë të bëjnë me nëntokën", tha Mersel Bilalli, analist.
Vizita e Ministrit të Jashtëm të Greqisë Evangeliz Venizelos, është e para pas rreth 10 vite ngrirje të marrëdhënieve mes Shkupit dhe Athinës. Venizleos në Shkup do të pritet nga presidenti Ivanov, kryeministri Gruevski, kreu i BDI-së Ali Ahmeti, zv/kryeministri Fatmir Besimi, Ministri i Jashtëm Nikolla Poposki si dhe lideri i opozitës maqedonase Zoran Zaev. Venizelos pritet të mbërrijë sonte me makinë nga Prishtina për të shmangur aeroportin Aleksandri i Madh. Semra Jakupi
