EVN Maqedoni organizon garë për studentët e fakulteteve ekonomike dhe teknike. Studentët duhet të përpunojnë një plan biznesi për efikasitetin energjetik. Të gjithë të interesuarit prej sot deri në prill do të mund ti ofrojnë idetë e tyre. Ata që do të përzgjidhen për pjesmarrje në garë do të marrin ndihmë në përpunimin e projekteve nga EVN. Aplikimi do të bëhet nëpërmjet faqes së internetit "energetskaazbuka.mk ". Tri projektet më të mira do të shpërblehen me 500, 300 dhe 150 euro.
"Sektori i biznesit është i vetëdijshëm se duhet të bashkëpunojmë ngushtë me arsimin dhe për këtë arsye EVN -- Maqedoni, deri tani zbatonte shumë programe për punësim, sidomos për të rinjtë, por ende ka hapësirë mes të nevojave të biznesit dhe atë që e ofron arsimi", deklaroi Verner Hengst , Kryetar i Bordit Drejtues të EVN Maqedoni.
Ministria e Ekonomisë dhe EVN Maqedoni vitin e kaluar filluan me një platformë për efikasitetin energjetik, ndërsa qëllimi është ngritja e vetëdijes dhe zbatimi i efikasitetit energjetik, kryesisht në sektorin real. Sipas të dhënave të fundit, mbi 30% e kompanive tashmë zbatojnë teknologji efikase energjetike.
"Qëllimi kryesor është që kompanitë që do të kursejnë këto mjete nga efikasiteti energjetik ti shfrytëzojnë për rritjen e konkurrencës dhe inovacioneve, por edhe fuqizimin e kompanive dhe kapaciteteve të tyre", tha Valon Saraqini, Ministër i Ekonomisë.
Sipas Strategjisë për përmirësimin e efikasitetit energjetik dhe planit aksionar për efikasitet energjetik parashikohet rritje e kursimeve energjetike për 9 % deri në vitin 2018. Për të arritur këto qëllime janë parashikuara 400 milion euro. Natasha Stojanovska
