U zhvillua në Bazën e Pashalimanit ceremonia e lëshimit në ujë e anijes më të re "Butrinti". Anija u ndërtua nga specialistë e punonjës të kantierit detar të Pashalimanit si dhe specialistë holandezë. Në ceremoninë e lëshimit në ujë të anijes merrnin pjesë gjeneralë dhe oficerë të lartë, zv.Ministri i Mbrojtes Dritan Hila, Gjeneral dhe oficerë të lartë të Bazës, Marinës dhe Ushtrisë Shqiptare, përfaqësues të kompanisë holandeze etj.
Fjalën e hapjes e mbajti komandanti i forcës detare, Gjeneral Brigade Qemal Shkurti , i cili u shpreh se anija "Butrinti" do ju shërbejë qytetarëve gjatë kryerjes së aktiviteteve turistike, kulturore dhe tregëtare në rolin e një anije humanitare që jep ndihmë mjeteve lundruese në rrezik, tanimë në ujërat e Adriatikut dhe Jonit janë 4 anije të rojës bregdetare që patrullojnë në raste alarmi SOS të çdo lloj mjeti lundrues detar.
Ndërkohe zv.Ministri i Mbrojtjes Dritan Hila, gjatë fjalës së tij vlerësoi finalizimin e këtij projekti të rëndësishëm duke e vënë theksin tek roli që do të luajnë anija "Butrinti" sëbashku me anijet e tjera në hapësirat detare.
Anija e parë "Iliria" mbërriti nga Hollanda në Shtator të vitit 2008, ndërkohë anija e parë që u prodhua në vend në Bazën e Pashalimanit ishte "Oriku" në vitin 2011, e dyta "Lisus" në 2012 dhe tashmë "Butrinti" në 2014. Ky si projekt mbyll dhe anijet patrulluese të klasit "Iliria", të cilat shërbejnë për emergjencat detare, zbatimin e ligjshmërisë si dhe operacionet humanitare kërkim-shpëtimi.
Ashtu sikurse e do tradita detare, gruaja e ish-oficerit veteran i nëndetëseve, Çapajev Smokthina, theu tek anija shishen e shampanjës e më pas anija zbriti nga doku në ujerat e Jonit për lundrim.
