Rreth 30 punime në pikturë dedikuar monumenteve të Beratit, janë prezantuar për qytetarët e Gjirokastrës, një qytet që gjithashtu shquhet për kulturë dhe histori.
Ekspozita e veçantë ku janë prezantuar punimet e 25 nxënësve piktorë nga qyteti i Beratit të moshës nga 9 - 18 vjeç, është prezantuar në sheshin kryesor të qytetit të Gjirokastrës, në "sheshin e Çerçizit" dhe është çelur në kuadër të ditës së monumenteve siç njihet 18 prilli.
E veçanta e kësaj vizite ka qenë dhurimi i një pjese të punimeve të tyre për repartin e pediatrisë së spitalit rajonal "Omer Nishani". Drejtoria e këtij spitali e ka vlerësuar grupin e piktorëve beratas "Art color" me çertifikatën e mirënjohjes.
Gjatë qëndrimit të tyre në Gjirokastër piktorët e vegjël kanë vizituar dy nga monumentet më të rëndësishme të Gjirokastrës, kalanë e qytetit dhe teatrin e Adrianopolit.
