Subjektet politike, fillimisht duhet të marrin mbështetjen e popullit më 27 prill e më pas të gëzojnë legjitimitetin që të bëjnë marrëveshje me partitë e tjera politike. Kështu vlerëson partia e Ali Ahmetit, duke theksuar se askush nuk ka të drejtë negocimi me partitë e tjera, para se të marrë mbështetjen e popullit.
"Dita e zgjedhjeve është ditë kur populli, në rastin tonë shqiptarët nënshkruajnë kontratë ose marrëveshje me një subjekt politik për t'i përfaqësuar ata në mandatin e ardhshëm. Asnjë parti politike nuk ka mandat të bisedojë me një parti tjetër politike, pa marr kontratën ose marrëveshjen paraprakisht prej popullit. BDI konsideron se fillimisht duhet që partitë politike të bëjnë këtë marrëveshje me popullin, pastaj të kenë legjitimitetin të bëjnë marrëveshje të tjera. Nuk bëhen marrëveshje nëpër restorante dhe kabinete por bëhen drejtpërdrejtë me popullin", tha Bujar Osmani, zëdhënës i BDI-së.
Marrëveshjet që bëhen para se partitë të marrin verdiktin e popullit, sipas BDI-sw, janë nënçmim dhe ofendim për qytetarët dhe dërgojnë porosi se vota e tyre është e parëndësishme.
"Mendojmë se nuk ka mënyrë më të rëndë për ta ofenduar dhe nënçmuar popullin tënd se sa t'i thuash atij se pavarësisht se a më mbështet ti apo jo, unë do të gjej mënyrë nga tjetër kush të kem mbështetje për ta përfaqësuar atë në institucionet e sistemet", tha Bujar Osmani, zëdhënës i BDI-së.
Osmani madje mohoi zërat për një marrëveshje paraprake me VMRO-DPMNE që posti i kreut të Parlamentit t'i takoj partisë së Ahmetit. Gjyltene Rexhallari
