TIRANE- Të ardhurat buxhetore janë 8.2 për qind më të larta se një vit më parë për periudhën janar-mars. Ky është sinjali më pozitiv i statistikave zyrtare të ministrisë së Financave për tremujorin. Sipas tyre, një rritje e ndjeshme ka ndodhur me të ardhurat nga taksa kryesore -- TVSH-ja, që ka sjellë në arkën e shtetit 20 për qind më shumë fonde se në të njejtën periudhë të 2013-ës, njëkohësisht 12.5% më shumë se shifra e planifikuar. Ndërkohë, akciza ka sjellë afro 25% më pak para se sa planifikimi dhe 13 për aind më pak se një vit më parë. Rënie ka shënuar edhe tatimi mbi të ardhurat personale, 12.1% më pak se një vit më parë dhe 5.2% më pak nga plani. Kurse e ardhura nga tatimfitimi mbi subjektet është afro 18 për qind më e lartë se një vit më parë.
Në përgjithësi, nga Tatimet dhe Doganat janë shënuar të hyra 9.3 për qind më shumë fonde se në janar-mars 2013. Duke qenë se shpenzimet kanë qenë për këtë periudhë 2.4% më të ulta se një vit më parë, edhe deficiti buxhetor është përgjysmuar, sipas këtyre statistikave. Ai është afro 57% më i ulët se më 2013. Por, ndër këto shpenzime buxhetore vihet re një ulje e ndjeshme e inv estimeve. Shpenzimet kapitale kanë qenë afro 27 për qind më të ulta se një vit më parë në tre muajt e 2013-ës, por 7.4% më të larta gjithsesi nga çfarë ishte planifikuar në buxhetin e këtij viti.
Fundi i tremujorit të parë pritej të tregonte të saktë tendencën e të hyrave nga tatim fitimi, me financat që shpresonin që të mblidhnin 50% më shumë të ardhura se janar-mars i vitit të kaluar, si rrjedhojë e rritjes së tatim fitimit nga 10 në 15% nga 1 janari (në bazë të skemës së re, tatim fitimi paguhet një herë në tre muaj, jo çdo muaj si më parë). Ndonëse ritmi i mbledhjes së këtij zëri u përmirësua në shkurt-mars, pas një janari të dobët, sërish të hyrat nga ky zë u shtuan vetëm me rreth 18% me bazë vjetore për tremujorin 2014, duke treguar se rritja e tatim fitimit për bizneset nuk po sjell rezultatet e planifikuara në buxhet.
Të ardhurat nga sigurimet shoqërore ranë me 5.7%, ndërsa të hyrat nga sigurimet shëndetësore u dyfishuan në 2.3 miliardë lekë, duke qenë faktori i tretë pas TVSH-së dhe ndihmave që ndikuan në rritjen e të ardhurave në buxhet. Rritja erdhi pas ndryshimit të skemës në janar, ku sigurimet shëndetësore llogariten tashmë në bazë të pagëse reala, jo asaj maksimale. Huamarrja e brendshme ka qenë 170% më e madhe se shifra e planifikuar. Ndërkohë, huaja e marrë afatgjatë jashtë vendit ka qenë 44.2 për qind më e lartë se ajo e planifikuar dhe gati 7% më e madhe se një vit më parë.
