Parregullsitë e shumta zgjedhore detyruan partinë më të madhe opozitare që të ndërmerrte hapin e mos njohjes së procesit zgjedhor, dhe mos pranimin e mandateve të fituara në zgjedhje. Kështu vlerësojnë ish funksionarët e LSDM-së Nikolla Popovski dhe Esad Rahiç. Sipas Poposkit opozita ishte e detyruar për një veprim të tillë. Si parregullsi më të theksuar, Popovski apostrofoi votuesit e Pustecit, duke i krahasuar me ajsbergun. Pjesa e fshehur, tha ai, është një sistem i tërë mashtrimi i pushtetit.
"Ata ishin të detyruar ta bënin këtë, thjeshtë nuk kishin zgjidhje tjetër. Kushdo që të ishte në vendin e tyre, besoj se do të mendonin ose do të merrnin vendim të ngjashëm. Ata tani janë njësoj si pushteti, i shfrytëzojnë të gjitha mjetet që kanë në dispozicion. Nuk kanë në dispozicion media, nuk kanë fonde shtetërore, nuk kanë institucione, të cilat jo që vetëm që nuk janë neutrale por janë në anën e kundërt dhe ata nuk kanë zgjidhje tjetër, bëjnë atë që bën pushteti, shfrytëzojnë të gjitha mjetet siç janë presionet e tilla", deklaroi Nikolla Popovski, ish funksionar i LSDM-së.
Vendimi i opozitës sipas Popovskit nuk paraqet shkelje të ligjeve dhe Kushtetutës. Ky veprim i tyre nuk është i ndaluar as me ligj e as me kushtetutë.
"Ata veprojnë në bazë të kushtetutës dhe ligjeve, nuk bëjnë kurrfarë shkelje. Në rast se nuk dëshirojnë t'i njohin zgjedhjet, nuk do t'i pranojnë. Në rast se nuk dëshirojnë të hyjnë në Kuvend, edhe ajo është ligjore, kushtetuese. Në rast se dëshirojnë t'i kthejnë mandatet, askush nuk i pengon që të mos i kthejnë. Qeveria mund të shpallë zgjedhje ku do të merrnin pjesë vetëm partitë e mazhorancës. Se cilat do të jenë pasojat, do të shohim", tha Nikolla Popovski, ish funksionar i LSDM-së.
Edhe ish funksionari i LSDM-së Esad Rahiç mbështet vendimin e LSDM-së, megjithatë deklaron se duhet shkuar edhe më tej, me bllokimin e punës së këshillave komunale.
"Ndoshta, heqja dorë duhej të ndodhte para raundit të dytë zgjedhor, megjithatë ky është vendim legjitim i udhëheqësish. Unë e mbështeta dhe kërkova që LSDM-ja për të qenë më legjitime, të bllokojë punën edhe në këshillat e komunave dhe në komunat ku kanë kryetar komune; sepse mendoj se vetëm ashtu do të na kuptojë seriozisht pushteti dhe bashkësia ndërkombëtare", u shpreh Esad Rahiç, ish funksionar i LSDM-së..
Sipas Rahiçit, në rast se VMRO-ja dhe BDI-ja arrijnë marrëveshje për koalicionin qeveritar, atëherë gjithçka tjetër bie në ujë. Me këtë, edhe vendimi i LSDM-së për mospranim të mandateve. Ndërkohë, ai nuk e përjashton mundësinë e presioneve ndërkombëtare ndaj LSDM-së për kthim në Kuvend. Bedri Rexhallari
