Lidershipi i PDSH-së vazhdon eliminimin e të gjithë kuadrove nga të cilët vlerëson se ndihet i rrezikuar. Kështu shprehet për Alsat, analisti Alajdin Demiri, i cili zhvillimet e fundit brenda këtij subjekti politik, i sheh si pengmarrje të partisë nga vet kreu i këtij subjekti dhe disa personave të afërt me të.
"Kjo përplasje nuk është asgjë e re në menaxhimin e PDSH-së dhe nuk është përplasje mes anëtarësisë ose strukturave partiake, por është të themi një qasje e lidershipit të PDSH-së i cila në këtë mënyrë e menaxhon politikën dhe në këtë mënyrë i eliminon të gjithë kuadrat, ndoshta edhe ndien rrezik, ndoshta edhe nuk është i interesuar për fitore të PDSH-së, por është i interesuar vetëm për mbajtje të status-quo-je të tillë të partisë ose është një pengmarrje e partisë në këtë mënyrë", u shpreh Alajdin Demiri, analist politik.
E gjithë kjo situatë brenda PDSH-së sipas Demirit mund të çojë në lindjen e një fraksion i ri, që nuk do të paraqiste diçka të re nga vet fakti se edhe PDSH-ja aktuale ka lindur si fraksion.
"Epilogu është vështirë të parashihet se, rezultatet e zgjedhjeve i mundësuan kryetarit të PDSH-së një sasi të deputetëve, pa marrë parasysh se ata nuk janë mazhorancë, janë një strukturë e cila mund t'i mundësojnë që të vazhdoje partia në këtë mënyrë. Nga ana tjetër pjesa tjetër e strukturës mund vetëm të bëj një fraksion. Kjo do të thotë se fati i partive politike shqiptare është te fraksionizmi nga brenda për arsye të mënyrës diktatoriale të udhëheqjes", tha Alajdin Demiri, analist politik.
Përplasjet brenda PDSH-së janë ashpërsuar pas zgjedhjeve të 27 prillit. Dega e Strugës e këtij subjekti nuk doli me rezultat të kënaqshëm zgjedhor dhe faji për këtë iu veshë kreut të kësaj komune Ziadin sela i cili pezulloi aktivitete e tij zgjedhore. Bedri Rexhallari
